Blinkén xitayning Uyghurlargha yürgüzgen "Irqiy qirghinchiliqi" gha "Qet'iy qarshi turidighanliqi" ni bildürgen

Muxbirimiz erkin
2021-04-12
Share

Amérika tashqiy ishlar ministiri antoni blinkén xitayning Uyghurlargha yürgüzgen "Irqiy qirghinchiliqi" ni yene bir qétim qattiq eyiblep, amérikaning xitayning bu xil "Qorqunchluq" kishilik hoquq depsendichilikige "Qet'iy qarshi turidighanliqi" ni bildürgen. Blinkén yene amérika shirketlirini Uyghur rayoni bilen soda alaqisi qilmasliqqa chaqirip, soda alaqiside bolghan bir qisim shirketlerning mejburiy emgek bilen bolghan munasiwiti seweblik eyibleshke uchrawatqanliqini tekitligen.

Blinkén bu sözlerni 11-april yekshenbe küni amérika NBC téléwiziye qanilining "Axbarat bilen uchrishish" heptilik programmisining ziyaritini qobul qilghanda bildürgen. Blinkén sözide yene amérikani öz ichige alghan dunyadiki her qaysi hökümetlerni "Konkirét heriket" qollinip, shirketlerning xitaygha Uyghurlarni basturidighan mehsulat yaki mulazimet bilen teminlimeslikke kapaletlik qilishqa chaqirghan.

U mundaq dégen: "Biz bir qanche ishni qilalishimiz kérek. Biz dunyani bir yerge jem qilip, yüz bergen we dawamliq yüz bériwatqan ishlarni birdek awazda eyibliyelishimiz lazim. Biz emeliy heriket qollinishqimiz, mesilen, héchqandaq bir shirkitimizning xitaygha puqralarni, jümlidin Uyghur ahalisini basturidighan nersiler bilen teminlimeslikige hödde qilishimiz kérek."

Blinkénning éytishiche, amérika béyjing qishliq olimpikini bayqut qilish-qilmasliqqa téxi qarar bermigen. U olimpikqa yene bir yildek waqit barliqi, hazir diqqitini nuqtiliq halda ittipaqdashliri bilen meslihetlishish, ularning pikirini élish we endishilirini anglashqa qaratqanliqi, hazir bir qarargha kélishning baldurluq qilidighanliqini bildügen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet