Uyghur diyaridiki “Irqiy qirghinchiliq” ning mewjutluqi köplep étirap qilinmaqta

Amérika hökümiti Uyghur diyaridiki siyasiy basturush we ijtima'iy paji'elerni “Irqiy qirghinchiliq” dep élan qilghandin kéyin qismen shexsler we teshkilatlar bu hökümni “Sel éghir kétip qaldi” dégen mezmunda pikir qilip kéliwatqanidi. Amérikadiki oqurmenliri eng köp bolghan zhurnallardin “Tashqi siyaset” zhurnili 15-aprél küni mexsus obzor élan qilip, Uyghurlar diyaridiki ré'alliqning “Irqiy qirghinchiliq” ning barliq tebirlirige toluq chüshidighanliqini yene bir qétim mu'eyyenleshtürdi.

Maqalida alahide qilip bezilerning Uyghur diyarida nöwette “Zor kölemlik qirghin boluwatqini yoq. Shunga uni qirghinchiliq déyish muwapiq emes” dégen sözlirining qilchilikmu asasi yoqluqi tekitlendi. Chünki birleshken döletler teshkilati (b d t) ning irqiy qirghinchiliq heqqidiki tebiride “Gherezlik halda melum bir milletni pütün yaki qismen yoq qilish qilmishi qirghinchiliq bolidu” dep éniq békitilgeniken. Yene kélip buningda manchilik adem ölüshi lazim, deydighan ölchemmu mewjut emes iken. Muhimi xitay hökümitining “Qesten” we “Gherezlik” halda Uyghurlarni yoq qiliwatqanliqining özi qirghinchiliqqa toluq chüshidiken.

Nöwette xitay hökümitining Uyghur diyaridiki til, medeniyet, tughut, turmush adetliri qatarliq sahelerde qiliwatqanlirining hemmisi “Gherezlik” halda Uyghurlarni yoq qilishtek ortaq bir netijini közligenliki üchün buni “Irqiy qirghinchiliq” dep atash héchqachan xata bolmaydiken.