Уйғур дияридики "ирқий қирғинчилиқ" ниң мәвҗутлуқи көпләп етирап қилинмақта

Мухбиримиз әзиз
2021-04-16
Share

Америка һөкүмити уйғур дияридики сиясий бастуруш вә иҗтимаий паҗиәләрни "ирқий қирғинчилиқ" дәп елан қилғандин кейин қисмән шәхсләр вә тәшкилатлар бу һөкүмни "сәл еғир кетип қалди" дегән мәзмунда пикир қилип келиватқаниди. Америкадики оқурмәнлири әң көп болған журналлардин "ташқи сиясәт" журнили 15-апрел күни мәхсус обзор елан қилип, уйғурлар дияридики реаллиқниң "ирқий қирғинчилиқ" ниң барлиқ тәбирлиригә толуқ чүшидиғанлиқини йәнә бир қетим муәййәнләштүрди.

Мақалида алаһидә қилип бәзиләрниң уйғур диярида нөвәттә "зор көләмлик қирғин болуватқини йоқ. Шуңа уни қирғинчилиқ дейиш мувапиқ әмәс" дегән сөзлириниң қилчиликму асаси йоқлуқи тәкитләнди. Чүнки бирләшкән дөләтләр тәшкилати (б д т) ниң ирқий қирғинчилиқ һәққидики тәбиридә "ғәрәзлик һалда мәлум бир милләтни пүтүн яки қисмән йоқ қилиш қилмиши қирғинчилиқ болиду" дәп ениқ бекитилгәникән. Йәнә келип буниңда манчилик адәм өлүши лазим, дәйдиған өлчәмму мәвҗут әмәс икән. Муһими хитай һөкүмитиниң "қәстән" вә "ғәрәзлик" һалда уйғурларни йоқ қиливатқанлиқиниң өзи қирғинчилиққа толуқ чүшидикән.

Нөвәттә хитай һөкүмитиниң уйғур дияридики тил, мәдәнийәт, туғут, турмуш адәтлири қатарлиқ саһәләрдә қиливатқанлириниң һәммиси "ғәрәзлик" һалда уйғурларни йоқ қилиштәк ортақ бир нәтиҗини көзлигәнлики үчүн буни "ирқий қирғинчилиқ" дәп аташ һечқачан хата болмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт