Kéngesh palata ezasi rubiyo wolkéswaginning xitaydiki Uyghur irqiy qirghinchiliqigha chétishliq shirketler bilen bolghan alaqisini sorüshtürdi

Muxbirimiz erkin
2022-04-29
Share

Amérika kéngesh palata ezasi marku rubiyo gérmaniye aptomobil shirkiti-wolkéswagénning prézidénti xérbért di'éske xet yézip, uning xitaydiki Uyghur irqiy qirghinchiliqigha chétishliq shirketler bilen bolghan alaqisini sürüshtürgen. Rubiyo xétide wolkéswagénning xu'ayü kobalt we chingshen hessidarliq guruhi qatarliq ikki xitay shirkiti bilen bolghan shérikchilik munasiwiti toghrisida yenimu ilgirlep uchur bilen teminlishini telep qilghan.

Rubiyoning xétide tekitlishiche, “Bu ikki shirket xitay kompartiyesining shinjang Uyghur aptonom rayonidiki Uyghur musulmanlirigha qaritilghan irqiy qirghinchiliq we démokratik kon'go jumhuriyitidiki adem etkeschilikining qurbani bolghan balilarni mejburiy emgekke sélishni ichige alghan dunya miqyasidiki qorqunchliq kishilik hoquq depsendichilikige ishtirak qilghan” iken.

Rubiyo xétide xu'ayo kobalt shirkitining kon'godiki kobalt qézishta bala ishchilarni mejburiy emgekke salghanliqi, chingshen hessidarliq guruhining hindonéziyede létiyum we nikél kanlirini qézishta yamghurliq ormanlarning ékologiye sistémisigha buzghunchiliq qilghanliqini eskertip: “Buningdin sirt wolkéswagén yene Uyghur we bashqa étnik, diniy guruppilarni, shundaqla xitay xelq jumhuriyitining irqiy qirghinchiliqigha uchrawatqan shinjang Uyghur aptonom rayonida Uyghur musulmanlirini mejburiy emgekke sélishtin paydigha ériship keldi,” dégen.

Rubiyo xétining axirida xérbért dé'isning Uyghurlargha irqiy qirghinchiliq élip bériliwatqanliqini étirap qilidighan-qilmaydighanliqi, wolkéswagénning ürümchidiki zawutida qul emgikini ishlitip baqqan-baqmighanliqi, uning ürümchidiki zawutini taqash pilanining bar-yoqliqi, shundaqla uning xitay kompartiyesi bilen bolghan munasiwiti qatarliq su'allargha jawap bérishini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet