Nikolas kristof: “Irqiy qirghinchiliq, dep qoyup héchnéme qilmisaq bolmaydu”
“Nyu-york waqti” gézitining ataqliq obzorchisi nikolas kristof 12-iyun mezkur gézitte maqale élan qilip, xitayning Uyghurlargha “Irqiy qirghinchiliq” qiliwatqanliqini élan qilip qoyup, héchnéme qilmasliqqa bolmaydighanliqini bildürgen.
-
Muxbirimiz erkin
2021-06-14 -
-
-
“Nyu-york waqti” gézitining ataqliq obzorchisi nikolas kristof 12-iyun mezkur gézitte maqale élan qilip, xitayning Uyghurlargha “Irqiy qirghinchiliq” qiliwatqanliqini élan qilip qoyup, héchnéme qilmasliqqa bolmaydighanliqini bildürgen. Uning éytishiche, kéler yilqi béyjing “Irqiy qirghinchiliq olimpiki” ni qismen bayqut qilish shundaqla shinjangda ishlepchiqirilghan mehsulatlarni cheklesh yéterlik we razi qilarliq bolmisimu, biraq héchnéme qilmasliqtin yaxshiraq iken.
Nikolas kristof “Bir ayalning xitayning wehshiylikide ötken kechmishliri” mawzuluq maqaliside, özining ismini nensi, dep atighan bir Uyghur ayal we uning a'ile ezalirining xitay da'iriliri teripidin tutqun qilinip, bezi a'ile ezalirining hazirghiche iz dérikining bolmasliqidek tragédiyelik kechmishi arqiliq Uyghurlarning nöwettiki weziyitini yorutup bergen.
U xitayning bir milyon Uyghurni lagérlargha qamishi diqqet qozghap, Uyghurlarning tughulushi sistémiliq azaytishqa uchrishi hazirghiche bek diqqet qozghimay kelgenliki, halbuki Uyghur nopusi xitay emeldarlirining nishanigha aylan'ghanliqini bildürgen.
Nikolas kristofning tekitlishiche, béyjing “Irqiy qirghinchiliq olimpiki” ni qismen bayqut qilish shundaqla shinjangda ishlepchiqirilghan mehsulatlarni cheklesh yéterlik we razi qilarliq bolmisimu shundaqla bu shi jinpingni yötkiyelmisimu, biraq xitayning Uyghurlargha “Irqiy qirghinchiliq” qiliwatqanliqini élan qilip qoyup, mürini chirip turushqa we héchnéme qilmasliqqa bolmaydiken.