Amérika uniwérsitétlirida xitayning Uyghurlargha yürgüziwatqan irqiy qirghinchiliqigha qarshi heriket qozghalghan

Muxbirimiz irade
2021-11-25
Share

Amérikadiki nopuzluq uniwérsitétlarning biri bolghan amérika katolik uniwérsitéti oqughuchilar mejlisi bu yil 10-ayda bir qarar maqullap, mektep da'irilirini Uyghurlargha yürgüzülüwatqan zulumgha chétishliq barliq meblegh türlirini emeldin qaldurushqa chaqirghan idi. Melum bolushiche, uniwérsitét da'iriliri oqughuchilarning telipini yerde qoymighan.

"Washin'gton pochitsi" gézitining dangliq iston yazghuchisi josh rogin 24-noyabir küni élan qilghan bu heqtiki maqalisige qarighanda, katolik uniwérsitétining mes'ulliri oqughuchilarning telipige asasen musteqil iqtisadiy teptish yallap uniwérsitétning barliq mebleghlirini tekshürüshni hawale qilghan.

Yuqiriqi bu qararni otturigha qoyghan oqughuchilar mejlisining ezasi gérald sharp josh rogin'gha qilghan sözide "Barliq uniwérsitétlar bundaq wehshiylikke chétilip qélishtin özini tartishi kérek. Menche bu usulning heqiqeten ünümi bolidu. Bu peqet bir bashlinish," dégen.

Melum bolushiche katolik uniwérsitéti oqughuchiliri hazir oqughuchilar bashqurushida qurulghan we payda almaydighan teshkilat bolghan aféna inistituti bilen birliship, özliri bashlighan bu heriketni barliq uniwérsitétlargha yéyish, ularningmu xitay hökümitining Uyghurlargha qaritiwatqan zulumini eyiblesh we uni toxtitishta heriket qollinishi üchün pa'aliyetlirini bashliwetken iken.

"Washin'gton pochtisi" gézitide éytilishiche, béyjing qishliq olimpiki ötküzülüshke sanaqliq künler qalghan, baydin hökümiti, dunya jama'etchiliki we soda dunyasi xitayning Uyghurlargha yürgüziwatqan irqiy qirghinchiliqini toxtitish üchün xitaygha qarshi yéterlik tedbir qollanmaywatqan bir mezgilde aliy mektep oqughuchilirining bundaq bir ishni bashlishi, intayin ehmiyetlik iken. Bu usul 1977-yili massachusétstiki xamshir uniwérsitéti teripidin jenubiy afriqadiki irqiy ayrimichiliq yürgüziwatqan hakimiyetke qarshi élip bérilghan herikette nahayiti zor utuq qazan'ghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet