Хитай дуня ислам һәмкарлиқ тәшкилатини лагерлар мәсилисидә хитайни қоллиғанлиқи үчүн мәдһийәлиди

Мухбиримиз ирадә
2019-03-05
Елхәт
Пикир
Share
Принт

Хитай ташқи ишлар министирлиқиниң баянатчиси лукаң 4-март күнидики күндилик ахбарат елан қилиш йиғинида дуня ислам һәмкарлиқ тәшкилатиниң уйғур елидики лагерлар мәсилисидә хитайни қоллиғанлиқиға мәдһийә оқуған.

Лукаң мундақ дегән: «2-март күни ислам һәмкарлиқ тәшкилатиниң 46-нөвәтлик ташқи ишлар министирлири йиғинида қобул қилинған қарарнамә хитай һөкүмитиниң хитайдики мусулман хәлқләр үчүн қилған хизмәтлириниң әң алий вә мукәммәл һалда етирап қилиниши болуп һесаблиниду, шундақла уларниң хитай билән һәмкарлишиш арзусини ипадә қилиду».

Пакистанниң «хәвәр» намлиқ тор гезитиниң бу һәқтики хәвиридин қариғанда, ислам һәмкарлиқ тәшкилатиға әза дөләтләр ташқи ишлар министирлириниң әбузәби шәһиридә ечилған йиғинидин кейин қобул қилинған қарарнамидә, хитайниң уйғур елидә йүргүзүватқан сиясәтлири тоғра дәп қобул қилиниш билән биргә, ғәрб әллириниң лагерлар мәсилисидики позитсийәси рәт қилинған икән.

Хитай һөкүмити уйғур елидә йолға қойған «қайта тәрбийә лагерлири «сәвәблик кишилик һоқуқ органлири вә демократик ғәрб әллириниң күчлүк тәнқидигә учриғандин кейин өзини қоллайдиған бир қисим дөләтләрниң дипломатлири вә мәтбуат хадимлирини уйғур елидә зиярәткә орунлаштурушни башлиған иди.

Хитай ташқи ишлар баянатчиси лукаң сөзидә йеқинда ислам һәмкарлиқ тәшкилати вәкиллириниңму «шинҗаңни зиярәт қилғанлиқи» ни ипадә қилип: «улар шинҗаңға берип өз көзи билән у йәрдики мусулманларниң бәхтликликини, уларниң хизмәткә орунлишиш шараитлириниң вә диний етиқад вәзийитиниң интайин яхшилиқини көрди. Улар бизниң миллий вә дини сиясәтлиримизни вә шундақла бизниң террорлуққа қарши туруш вә радикаллиқни түгитиштики алдини елиш характерлик сиясәтлиримизни толуқ етирап қилди» дегән.

Дуня ислам һәмкарлиқ тәшкилати өзиниң рәсмий тор бетидә гәрчә өзлирини «мусулман дунясиниң коллектип авази» дәп тәшвиқ қилсиму бирақ униң уйғур елидә 2 милйон әтрапида уйғур, қазақ қатарлиқ мусулман хәлқләр учраватқан еғир зулум мәсилисидә хитайни қоллиши күчлүк тәнқид обйекти болмақта. Чәтәлләрдики уйғур көзәткүчиләр: «америка қатарлиқ ғәрб әллири уйғур мусулманлириға қилиниватқан еғир бесим сияситини әйибләп, уйғурларни қоғдаш үчүн һәрикәт қиливатқанда, буниң әксичә ислам һәмкарлиқ тәшкилати әзалириниң бир инсан болуш сүпити биләнму бу җинайәтни тәнқид қилалмаслиқи толиму әпсуслинарлиқ» дәп көрсәтти.

Йеқинда хитайда зиярәттә болған сәуди әрәбистан шаһзадиси, тәхт вариси муһәммәд бин салманму хитайниң «террорлуқ» вә «радикаллиқ» қа қарши туруш тәдбирлирини елиш һоқуқи барлиқини билдүргән иди.

Пикирләр (0)
Share
Толуқ бәт