Xitay dunya islam hemkarliq teshkilatini lagérlar mesiliside xitayni qollighanliqi üchün medhiyelidi

Muxbirimiz irade
2019-03-05
Élxet
Pikir
Share
Print

Xitay tashqi ishlar ministirliqining bayanatchisi lukang 4-mart künidiki kündilik axbarat élan qilish yighinida dunya islam hemkarliq teshkilatining Uyghur élidiki lagérlar mesiliside xitayni qollighanliqigha medhiye oqughan.

Lukang mundaq dégen: "2-Mart küni islam hemkarliq teshkilatining 46-nöwetlik tashqi ishlar ministirliri yighinida qobul qilin'ghan qararname xitay hökümitining xitaydiki musulman xelqler üchün qilghan xizmetlirining eng aliy we mukemmel halda étirap qilinishi bolup hésablinidu, shundaqla ularning xitay bilen hemkarlishish arzusini ipade qilidu".

Pakistanning "Xewer" namliq tor gézitining bu heqtiki xewiridin qarighanda, islam hemkarliq teshkilatigha eza döletler tashqi ishlar ministirlirining ebuzebi shehiride échilghan yighinidin kéyin qobul qilin'ghan qararnamide, xitayning Uyghur élide yürgüzüwatqan siyasetliri toghra dep qobul qilinish bilen birge, gherb ellirining lagérlar mesilisidiki pozitsiyesi ret qilin'ghan iken.

Xitay hökümiti Uyghur élide yolgha qoyghan "Qayta terbiye lagérliri "Seweblik kishilik hoquq organliri we démokratik gherb ellirining küchlük tenqidige uchrighandin kéyin özini qollaydighan bir qisim döletlerning diplomatliri we metbu'at xadimlirini Uyghur élide ziyaretke orunlashturushni bashlighan idi.

Xitay tashqi ishlar bayanatchisi lukang sözide yéqinda islam hemkarliq teshkilati wekilliriningmu "Shinjangni ziyaret qilghanliqi" ni ipade qilip: "Ular shinjanggha bérip öz közi bilen u yerdiki musulmanlarning bextliklikini, ularning xizmetke orunlishish shara'itlirining we diniy étiqad weziyitining intayin yaxshiliqini kördi. Ular bizning milliy we dini siyasetlirimizni we shundaqla bizning térrorluqqa qarshi turush we radikalliqni tügitishtiki aldini élish xaraktérlik siyasetlirimizni toluq étirap qildi" dégen.

Dunya islam hemkarliq teshkilati özining resmiy tor bétide gerche özlirini "Musulman dunyasining kolléktip awazi" dep teshwiq qilsimu biraq uning Uyghur élide 2 milyon etrapida Uyghur, qazaq qatarliq musulman xelqler uchrawatqan éghir zulum mesiliside xitayni qollishi küchlük tenqid obyékti bolmaqta. Chet'ellerdiki Uyghur közetküchiler: "Amérika qatarliq gherb elliri Uyghur musulmanlirigha qiliniwatqan éghir bésim siyasitini eyiblep, Uyghurlarni qoghdash üchün heriket qiliwatqanda, buning eksiche islam hemkarliq teshkilati ezalirining bir insan bolush süpiti bilenmu bu jinayetni tenqid qilalmasliqi tolimu epsuslinarliq" dep körsetti.

Yéqinda xitayda ziyarette bolghan se'udi erebistan shahzadisi, text warisi muhemmed bin salmanmu xitayning "Térrorluq" we "Radikalliq" qa qarshi turush tedbirlirini élish hoquqi barliqini bildürgen idi.

Toluq bet