Ислам һәмкарлиқ тәшкилати уйғурларға қаримай хуавей билән һәмкарлашқан

“оттура шәрқ көзи” тори ислам һәмкарлиқ тәшкилати тор бихәтәрлик идарисиниң хитай технологийә ширкити хуавей билән һәмкарлишиши уйғурларда әндишә қозғиғанлиқини хәвәр қилди. Мәзкур торниң 1-апрел бәргән хәвиридә, хуавейниң уйғурларни тәқиб қилидиған йүз тонуш юмтали ишләшкә қатнашқанлиқи, ислам һәмкарлиқ тәшкилатиниң бу шәркәт билән шериклик мунасивити қуруши уйғур тәшкилатлирини әндишигә салғанлиқини билдүргән.

Хәвәрдә, хуавейниң уйғурларни тәқибләшкә қатнашқанлиқи кәң тарқалған болсиму, бирақ ислам һәмкарлиқ тәшкилати тор бихәтәрлик идарисиниң йәнила униң билән шерикләшкәнлики билдүрүлгән. Хәвәрдә ейтилишичә, хуавей ширкити 31-март ислам һәмкарлиқ тәшкилати тор бихәтәрлик гурупписиниң әзасиға айлинип, униң билән шерикләшкән тунҗи хәлқара ширкәт болғанлиқини елан қилған. Хуавей ширкити ислам һәмкарлиқ тәшкилатиға әза дөләтләрниң тор бихәтәрлик техникисини қурушиға ярдәм беридикән.

Ислам һәмкарлиқ тәшкилатиниң қарари дуняниң уйғур қурултийини әпсусландурған. Хәвәрдә ейтилишичә, д у қ ниң рәиси долқун әйса “мусулманлар дунясиниң коллектип авази болған ислам һәмкарлиқ тәшкилатиниң хуавей билән шериклишиши кишини әпсусландуриду. Дәлилләр хуавейниң хитай даирилири билән һәмкарлишип, ирқий қирғинчилиққа учраватқан уйғурларниң йүз тонуш юмшақ деталини тәрәққий қилдурғанлиқини көрсәтмәктә” дегән. Униң ейтишичә, “әгәр ислам һәмкарлиқ тәшкилати мусулманлар дунясиниң авази болимән десә, хитайниң җинайитигә қарши туруши, униң ширкити билән шерик болмаслиқи керәк” икән.