Islam hemkarliq teshkilati Uyghurlargha qarimay xu'awéy bilen hemkarlashqan

“Ottura sherq közi” tori islam hemkarliq teshkilati tor bixeterlik idarisining xitay téxnologiye shirkiti xu'awéy bilen hemkarlishishi Uyghurlarda endishe qozghighanliqini xewer qildi. Mezkur torning 1-aprél bergen xewiride, xu'awéyning Uyghurlarni teqib qilidighan yüz tonush yumtali ishleshke qatnashqanliqi, islam hemkarliq teshkilatining bu sherket bilen shériklik munasiwiti qurushi Uyghur teshkilatlirini endishige salghanliqini bildürgen.

Xewerde, xu'awéyning Uyghurlarni teqibleshke qatnashqanliqi keng tarqalghan bolsimu, biraq islam hemkarliq teshkilati tor bixeterlik idarisining yenila uning bilen shérikleshkenliki bildürülgen. Xewerde éytilishiche, xu'awéy shirkiti 31-mart islam hemkarliq teshkilati tor bixeterlik guruppisining ezasigha aylinip, uning bilen shérikleshken tunji xelq'ara shirket bolghanliqini élan qilghan. Xu'awéy shirkiti islam hemkarliq teshkilatigha eza döletlerning tor bixeterlik téxnikisini qurushigha yardem béridiken.

Islam hemkarliq teshkilatining qarari dunyaning Uyghur qurultiyini epsuslandurghan. Xewerde éytilishiche, d u q ning re'isi dolqun eysa “Musulmanlar dunyasining kolléktip awazi bolghan islam hemkarliq teshkilatining xu'awéy bilen shériklishishi kishini epsuslanduridu. Deliller xu'awéyning xitay da'iriliri bilen hemkarliship, irqiy qirghinchiliqqa uchrawatqan Uyghurlarning yüz tonush yumshaq détalini tereqqiy qildurghanliqini körsetmekte” dégen. Uning éytishiche, “Eger islam hemkarliq teshkilati musulmanlar dunyasining awazi bolimen dése, xitayning jinayitige qarshi turushi, uning shirkiti bilen shérik bolmasliqi kérek” iken.