Türkistan islam partiyesi: “Xitay hökümitining xataliqi üchün xitay xelqi jazalanmasliqi kérek”

Amérikidiki “Heptilik xewerler” zhornili özining yéqinqi sanlirida “Türkistan islam partiyesi” ning bayanatlirigha keng orun bérishke bashlighan. Mezkur zhornal ötken heptisiki bir xewiride mezkur guruhning özlirige bayanat bérip: “Amérikaning afghanistandin chékinishi xitaygha qarshi turushining pursiti” dep körsetkenlikini ilgiri sürgen. Bu xewer xitay hökümiti amérikadin “Sherqiy türkistan islam herikiti” ni qaytidin “Térorluq teshkilatlar tizimliki” ge élishni telep qiliwatqan mezgilde élan qilin'ghan idi.

“Heptilik xewerler” zhornili 12-séntebir “Türkistan islam partiyesi” heqqide yene xewer bergen. Xewerde éytilishiche, bu guruhning bir bayanatchisi “Eger xitay yer sharida cheklenmise, u bügün bizning meschitlirimizni chéqip, ‛qur'an‚ ni cheklep, kishilik hoquqimizgha xilapliq qilghinidek, kelgüside dunya uning ‛tewrat‚ we ‛injil‚ ni cheklep, chérkawlarni mal qotunigha aylandurghanliqigha shahit bolidu,” dégen. Mezkur bayanatchining “Heptilik xewerler” ge éytishiche, ular “Amérika hökümitiningla emes, barliq döletler we xelqlerning xitaygha qarshi heriket qollinishini ümid qilidiken.”

Xewerde bu bayanatchining ismi we bu bayanatni nede turup bergenliki tilgha élinmighan. Biraq bu namsiz bayanatchi yene: “Xitay xelqi xitay hökümiti sadir qilghan xataliqlar üchün jazalanmasliqi lazim …xitay xelqi zalim xitay hökümitini özi aghdurup tashlishi kérek,” dégen.

“Heptilik xewerler” zhornilining éytishiche, amérika tashqiy ishlar ministirliqi “Türkistan islam partiyesi” ning bayanatigha qarita derhal inkas bildürmigen. Lékin xewerde, tashqiy ishlar ministirliqining bu yil 6-ayda “Sherqiy türkistan islam herikiti” ni “Térorluq teshkilatlar tizimliki” din chiqiriwetkenlikini delilligenliki tekitlen'gen.