Xitay, "Shinjang islam jem'iyiti" qatarliq organlarni amérikani eyibleshke saldi

Muxbirimiz irade
2019-12-05
Élxet
Pikir
Share
Print

Xitay hökümitining Uyghurlargha qaratqan siyasetlirini eyibleydighan "2019-Yilliq Uyghur kishilik hoquq qanun layihesini" ning amérika awam palatasida mutleq köp sanliq awaz bilen maqullinishi xitayni qattiq bi'aram qildi. Xitay hökümiti öz taratquliri arqiliq oxshimighan organ we shexsler namidin arqimu-arqa bayanat élan qilip, amérikaning herikitini jan-jehli bilen eyibleshke bashlidi.

Uyghur élidiki hökümet awazi bolghan "Tengritagh tori" ning xewerler sehipiside orun alghan yazmilarning köp qismi mana mushu xil naraziliq bayanliri bilen tolghan. Bügün yeni 5-dékabir küni, "Xitay islam jem'iyiti" we "Shinjang islam jem'iyiti" ayrim-ayrim halda bayanat élan qilip, amérikani tenqidligen.

"Shinjang islam jem'iyiti" bayanatida, "Özlirining Uyghur élidiki 10 milyondin oshuq musulman ammigha wakaletlik qilidighanliqini" ilgiri sürüp turup, amérikaning bu qanun layihesige her millet musulman ammisining qet'iy qarshi turidighanliqini bildürgen.

Ular bayanatida, "Amérika dölet mejlis ezaliri rayondiki emeliyetni bilmey turup, bu yerge kélip baqmay turup, bizning kishilik hoquq weziyitimiz heqqide biljirlidi" dégen. Halbuki, shinjang islam jem'iyiti amérikaning dégenlirige qarshi ilgiri sürgen pakitlirida oxshashla "Uyghur élide jem'iy 20 mingdin oshuq meschit bar, 29 minggha yéqin dini xadim bar, rayon, wilayet we nahiyelerde herqaysi derijilik 103 islam dini jem'iyiti bar. . . Qur'an kérim xitayche, Uyghurche, qazaqche, qirghizche 4 xil tilda neshr qilin'ghan" dégendek kona geplerni tekrarlighan.

"Xitay islam jem'iyiti" mu 5-dékabir küni élan qilghan bayanatida, xitay xelq jumhuriyiti qurulghandin buyan, kompartiyening yétekchilikide Uyghur rayonidiki her millet ammisining milliy we dini hoquqlirining toluq kapaletke ige qilin'ghanliqini bildürüp, amérikani "'shinjang arqiliq junggoni cheklesh'tek rezil niyitini yene bir qétim ashkarilidi" dep tenqidligen. Ularmu oxshashla yuqiridiki shinjang islam jem'iyitige oxshash Uyghur élide 24 mingdin oshuq meschit barliqini bayan qilghan. Emma u meschitlerge kirishke bolmaydighanliqidin söz achmighan.

Amérika awam palatasida Uyghur kishilik hoquq qanun layihesi 1 ge qarshi 407 awaz bilen maqullan'ghandin kéyin xitay tashqi ishlar ministirliqi, xitay shinxu'a agéntliqi, xelq géziti, Uyghur rayonluq hökümet we uning erkin tuniyaz, shawket imin we bashqa nurghun organ we shexsliri naraziliq bayanatliri élan qilindi. Uyghur tilidiki "Shinjang téléwiziye istansisi" mu öz xewerliride rayondiki hersahe kishilerni amérikaning Uyghur qanun layihesige qarshi naraziliqini ipadileshke salghan.

Chet'ellerdiki weziyet közetküchiliri xitayning bu nöwet amérikaning herikitidin endishige chüshkenlikini mölcherlimekte.

Toluq bet