Kuweytning sabiq parlamént ezasi muhemmed heyf elmuteyri: “Uyghur musulmanliri xitaydin musteqilliq telep qilishi kérek”

Kuweytning sabiq parlamént ezasi muhemmed heyf elmuteyri “Uyghur musulmanliri xitaydin musteqilliq telep qilishi kérek”, dégen.

Kuweytning sabiq parlamént ezasi muhemmed hayéf elmuteyri bu sözlerni yéqinda istanbulda ötküzülgen “Xelq'ara sherqiy türkistanni qollash” ilmiy muhakime yighinida qilghan bolup, u mundaq dégen: “Uyghur musulmanliri xitaydin musteqil bolushni telep qilishi kérek. Uyghurlar buni bek chong telep dep qarimasliqi, da'im telepni yuqiri qoyushi kérek. Uyghurlar emdi aptonomiye telep qilmay, sherqiy türkistanni ishghal qilin'ghan we bulang-talang qilin'ghan dölet, dep jakarlishi kérek”.

“Xelq'ara sherqiy türkistanni qollash” ilmiy muhakime yighini merkizi istanbulgha jaylashqan sherqiy türkistan ölimalar birlikining uyushturushi bilen 10-iyundin 12-iyun'ghiche istanbulda ötküzülgenidi. Muhakime yighinigha 40 dek dölettin kelgen ölimalar, parlamént ezaliri, qanunshunaslar, siyasiyonlar we zhurnalistlar bolup, köp sanda kishi qatnashqan.

Kuweyt sabiq parlamént ezasi muhemmed heyf elmuteyrining sözliri ereb dunyasidimu diqqet qozghighan bolup, merkizi washin'gton'gha jaylashqan “Ottura sherq axbarat tetqiqat orni” uning bu sözlirini öz tor bétide élan qilghan.