“Yéngi ereb” géziti: “Qoy térisige oriniwalghan böre: xitayning moda kiyim-kéchek arqiliq Uyghur qirghinchiliqini yoshurushi”

Muxbirimiz irade
2022.06.23

Ereb dunyasigha xitab qilidighan “Yéngi ereb” namliq tor gézitide xitayning moda kiyim-kéchek sahesini qandaq qilip Uyghur mejburiy emgiki bilen bulghawatqanliqi heqqide bir zor hejimlik maqale élan qilin'ghan. Mezkur maqalige “Qoy térisige oriniwalghan böre: xitayning moda kiyim-kéchek arqiliq Uyghur qirghinchiliqini yoshurushi” dep mawzu qoyulghan.

Mezkur maqalida xitayning “Shéyin” namliq kiyim-kéchek markisi nuqtiliq halda misal qilinip turup, ereb dunyasida nahayiti alqishqa érishiwatqan bu markining emeliyette emgekchilerning hayati bolupmu Uyghurlarning irqiy qirghinchiliqi bedilige kelgenliki chüshendürülgen.

Maqalida körsitilishiche, “Shéyin” instagram we tik-tok qatarliq ijtima'iy alaqe supilirini ünümlük qollinip turup nahayiti zor egeshküchi toplighan bolup, uning erebche torining özidila 5 milyon'gha yéqin egeshküchisi bar iken. “ZARA” qatarliq özige reqib markilarning layihelirini köchürüp uni intayin erzan bahada satidighan “Shéyin” yene ereb xéridarlarni jelp qilish üchün diniy yosunlargha maslashturulghan uzun yopka, keng ishtan, kaftan qatarliq erebche kiyimlerge munasiwetlik mexsus türlernimu tereqqiy qildurghan bolghachqa uning mehsulatliri ereb birleshme xelipiliki we se'udi erebistanda alahide yaxshi körülidiken.

Maqalida “Shéyin” marki'isning mana mushuningdek bazar istratégiyeliri arqiliq kishilik hoquq buzghunchiliqi we ishchi-xizmetchilerni ékspilatatsiye qilishtek qorqunchluq ré'alliqni yoshurup qalghanliqi, eslidila ishchi-xizmetchilerni nachar shara'itlarda ishlitip, ularning her türlük ximiyelik maddilardin zeherlinishi, heddidin ziyade charchishidek ehwallarni keltürüp chiqiriwatqanliqi körsitilgen. Shuning bilen birge “Shéyin” markisining 2014-yili xitay hökümiti Uyghurlargha mejburiy emgek we irqiy qirghinchiliq siyasetlirini bashlighandin tartip bu zulumgha shérik boluwatqanliqi tepsiliy bayan qilin'ghan.

Maqalida awstraliyediki istratégiye tetqiqat merkizining (ASPI) Uyghur mejburiy emgiki heqqidiki tetqiqati we shundaqla yawropa Uyghur institutining mudiri, jem'iyetshunas dilnur reyhanning sözlirige asasen Uyghurlar uchrawatqan mejburiy emgek we irqiy qirghinchiliq tonushturulghan.

Xewer töwendiki sözler bilen ayaghlashqan: “Dilnur sözide moda kiyim-kéchek shirketlirining jinayiti Uyghur pa'aliyetchiliri we gherblik siyasiyonlarning harmay-talmay küresh qilishi bilen ashkarilan'ghan bolsimu, biraq musulman rehberlerning xitayni insaniyetke qarshi yürgüzüwatqan siyasetlirini toxtitishqa chaqirmaywatqanliqini eyiblidi we musulman dölet hökümetlirini derhal Uyghur xelqi bilen bir septe turushqa chaqirdi”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.