Se'udi erebistan we rusiye qatarliq 37 dölet xitayning Uyghur élidiki siyasetlirini qollap b d t gha imzaliq mektup yollighan

Muxbirimiz irade
2019-07-12
Élxet
Pikir
Share
Print

10-Iyul küni, b d t kishilik hoquq kéngishige eza 22 dölet xitayning Uyghur élide yolgha qoyghan lagér tüzümi we bashqa teqiblesh siyasetlirini qattiq tenqid qilip, ortaq bayanat élan qilghandin kéyin, xitay terepmu özining Uyghur élidiki siyasetlirining 37 döletning qollishigha érishkenlikini ilgiri sürgen.

Roytérs agéntliqining xewer qilishiche, se'udi erebistan we rusiye qatarliq 37 dölet 12-iyul jüme küni, b d t gha imzaliq xet tapshurush arqiliq xitayning Uyghur élide yolgha qoyghan siyasetlirini qollaydighanliqini ipade qilghan iken.

Xewerde bayan qilinishiche, roytérs agéntliqi muxbiri xetni biwasite körgen bolup, uningda "Térrorluq we radikalliqning ghayet zor tehditige uchrighan xitay, shinjangda térrorluqqa qarshi turush we radikalliqni tügitish yolida kespiy maharet boyiche terbiyelesh qatarliq bir qatar tedbirlerni aldi" déyilgen.

Xette yene, "Buning bilen rayonda bixeterlikning qayta berpa qilinip, hemme millet xelqining asasiy hoquqlirining kapaletke ige qilindi, bu seweblik 3 yildin buyan rayonda bir qétimmu térrorluq weqesi yüz bermidi we kishiler bext we xatirjemliktin toluq behrimen boldi" dégen sözler orun alghan iken.

Mezkur ortaq imzaliq xetke se'udi erebistan, rusiye, shimaliy koréye, wénsu'ila, kuba, bélarusiye, birma, filippin, süriye, pakistan, oman, kuweyt, qatar, ereb birleshme xelipiliki, behreyn we bir qatar afriqa döletlirining b d t diki elchiliri teripidin imza qoyulghan.

Kishilik hoquqni közitish teshkilati xitay ishliri diréktori sofi richardson bolsa tiwittérda bu heqte bergen bahasida, yuqirida qol qoyghan döletlerning asasen dégüdek kishilik hoquqni depsende qilghuchi döletler ikenlikini bildürgen.

Chet'ellerdiki Uyghur közetküchiler bolsa xitayning Uyghur élidiki siyasetlirini qollap imza qoyghan se'udi erebistan bashchiliqidiki bu atalmish musulman döletler özining "Nomussizliqini, shermendilerche ikki yüzlimichilikini yene bir qétim ispatlap berdi" dédi.

12-Iyul küni, hindistanda chiqidighan "Neshir" namliq tor gézitide "Islam döletlirining xitayning Uyghur musulmanlirigha qiliwatqan mu'amilisi aldidiki shermendilerche süküti" namliq maqale élan qilin'ghan. Maqalide, pakistan we se'udi erebistanning xitayning pulini depla süküt qiliwatqanliqi, gerche "Tilemchi" ning sükütini chüshinishke bolsimu, emma shunche bay qoltuq döletliridin teshkillen'gen "Islam hemkarliq teshkilati" ning süküt qiliwatqanliqi we buning sewebining bu teshkilatqa eza döletler özining eslide éghir kishilik hoquq depsendichisi ikenlikini bayan qilin'ghan.

Toluq bet