Ислам әллириниң уйғур мәсилисидики йүзсизлики йәнә бир қетим тәнқид обйекти болди

Мухбиримиз ирадә
2020-11-19
Share

Ислам әллириниң уйғур мәсилисидики йүзсизлики йәнә бир қетим тәнқид обйекти болди. «Йерусалем почтиси гезити» дә елан қилинған «мусулман дунясиниң мунапиқлиқини чүшиниш» намлиқ мулаһизә мақалисидә йеқинда фирансийәдики бир мәктәп оқутқучисиниң қорқунчлуқ шәкилдә өлтүрүлүши билән фирансийә президенти макронниң пикир әркинликини қоғдиши вә арқидин буниңға қарши нес вә вийенада террорлуқ һуҗумлириниң йүз бериши қатарлиқ вәқәләр әслитилип, мусулман рәһбәрлириниң фирансийә вә хитайға қайтурған инкаси селиштурулған.

Униңда мунулар баян қилинған: «фирансийә мусулманлар дунясиниң ғәзипигә учриди, нурғун дөләтләрдә кәң көләмлик намайишлар елип берилди. Пакистан баш министири имран хан явропаниң аталмиш ‹ислам дүшмәнлики' ни әйиблиди, түркийә президенти рәҗәп таййип әрдоған мусулманларниң фирансийә мәһсулатлирини байқут қилишиға рәһбәрлик қилди, малайсияниң сабиқ баш министири маһатир бин муһәммәд мусулманларниң ‹милйонлиған франсийәликләрни өлтүрүш һоқуқи бар' дәп кәскин тәлим бәрди. Бирақ уларниң фирансийәниң сөз әркинлики вә диндин халий яшаш усулини ‹ислам дүшмәнлики' дәп қарап ғәзәплиниши хитайниң уйғурларға қиливатқан муамилисигә сүкүт қилиши вә һәтта уни қоғдиши алдида бир тийинға һесаб.»

Мақалидә хитай һөкүмити бир милйондин артуқ уйғур мусулманлирини лагерларға қамап, уларни динидин ваз кечишкә, уни әйибләшкә, чошқа гөши вә һарақ истемал қилишқа мәҗбурлап, аялларни мәҗбурий туғмас қилип, мәсчитләрни вәйран қилип, исламни сақайтишқа тегишлик «вирус» дәп тәсвирләш арқилиқ исламфобийәни очуқ намаян қилған туруқлуқ, мусулман дунясидин буниңға қарши бир сада көтүрүлмигәнлики тәкитләнгән. Мақалидә «хитайниң ислам дүшмәнликини әйибләйдиған батуранә чақириқлар оттуриға чиқмиди. Хитайниң мәһсулатлирини байқут қилиш чақириқи қилинмиди, ши җинпиңниң сүритини дәссәп-чәйләйдиғанлар чиқмиди, хитайниң байриқини көйдүрүдиғанлар чиқмиди, ‹хитайға өлүм' дәп варқирашлар оттуриға чиқмиди,» дейилгән.

Мақалидә сәуди әрәбистан, мисир, пәләстин, иран вә пакистан қатарлиқ мусулман дөләтләрниң көпинчисиниң хитайниң уйғурларға қиливатқан зулумини қоллап бәргәнлики, әрдоғанниң һәтта хитай билән болған иқтисадий вә сиясий мәнпәәтини қоғдаш үчүн, сүргүндә йүрүватқан бир қисим уйғурларни қолға елиш вә чеградин қоғлап чиқиришқа башлиғанлиқи баян қилинған.

Мақалидә йәнә мунулар дейилгән: «бу рәһбәрләр көрсәткән мунапиқлиқ уларниң мәқситиниң исламға өчмәнлик қилишни йоқитиш әмәс, бәлки сөз әркинликигә һуҗум қилиш икәнликини испатлайду. Сөз әркинлики демократийиниң түврүки болуп, у мустәбит һакимийәтләргә, болупму демократик дөләт қияпитигә киривалғанларниң мәвҗутлуқиға тәһдит елип келиду. Исламға өчмәнлик қилди, дәп фирансийәгә һуҗум қилған дөләтләр пәқәт вә пәқәт өз дөләтлиридики яхши бир тәрәп қилинмиған вирус юқуми, һәддидин зиядә чириклишиш вә иқтисадий шараитниң начарлишишидин нарази болуватқан хәлқ аммисиниң диққитини бурашни мәқсәт қилған. Бу һоқуқни мустәһкәмләштики интайин рәзил сиясий суйқәсттин башқа нәрсә әмәс»

«Йерусалем почтиси» дә елан қилинған бу мақалини келлий алхоли язған болуп, у фирансийәдики сиясий вә ташқи ишлар мәркизи (CPFA) ниң хәлқара мунасивәтләр директори болуп хизмәт қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт