Uyghur teshkilatliri bilen musulman teshkilatliri birliship “Islam hemkarliq teshkilati” gha mektup yollidi

Yéqinda dunyaning herqaysi jayliridiki 90 nechche teshkilat birliship “Islam hemkarliq teshkilati” gha ochuq mektup yollidi hemde ulardin “Sherqiy türkistandiki Uyghur qirghinchiliqigha süküt qilishqa emdi ilaj yoq” dédi.

18-Dékabir küni dunya Uyghur qurultiyi (d u q) ning tor bétide élan qilin'ghan bu heqtiki ochuq mektupta éytilishiche, ular Uyghurlarning lagérlargha qamilishi we zor tutqun'gha giriptar bolushi heqqidiki omumi ehwalni yene bir qétim eskertip ötken. Arqidinla xitay hökümitining islam dinigha da'ir barche hadisilerni, jümlidin namaz oqush, saqal-burut qoyush, halal-haram chüshenchisi boyiche yashash qatarliqlarni térrorluqqa baghlap Uyghurlarni basturuwatqanliqini, meschitlerning chéqilip musulmanlarning choshqa göshi yiéyshke mejburliniwatqanliqini bir-birlep tilgha élip “Xitay hökümitining Uyghurlargha qiliwatqanliri alliqachan ‛qirghinchiliq‚ dep jakarlandi. Bu heqtiki ispatlar taghdek döwilinip yétiptu. Emdi silerning bu qeder zulumgha süküt qilishinglargha qilchimu orun qalmidi” déyilidu.

Mektupning axirida ular “Islam hemkarliq teshkilati” ni xitayning zulumlirigha shérik bolmasliqqa hemde heqqaniyetni yaqlap dunya miqyasida özining izzet-abroyini emelge ashurushqa dewet qilghan.

Melum bolushiche, bu ochuq mektupqa malayshiya, hindonéziye, tayland qatarliq jaylardiki dangliq islam ölimaliri, shundaqla dunyaning herqaysi jayliridiki mutleq köp qisim Uyghur teshkilatliri birliship imza qoyghan. Bash shtabi se'udi erebistanining jidde shehiridiki “Islam hemkarliq teshkilati” gha hazir 57 islam döliti eza bolup, bularning köp qismi xelq'ara munberlerde xitay hökümitining Uyghurlarni basturushini qollighanliqi üchün tenqidlerge uchrap kelgenidi.