Әрәб дөләтлириниң хитайдики әлчилири "булут үстидин уйғурларни көрди"

Мухбиримиз әзиз
2021-06-01
Share

Хитай һөкүмитиниң өзини ақлаш тәшвиқатлиридики бир муһим һалқа йеқинқи мәзгилләрдин буян хитайда хизмәт қиливатқан чәтәл дипломатлирини түрлүк паалийәтләргә тәшкилләш арқилиқ өзлириниң қанчилик "көйүмчан" бир һакимийәт икәнликини пәш қилишта ипадилиниватқанлиқи мәлум. Бу хилдики паалийәтләрниң бири йеқинда шаңхәй чәтәл тиллири университетида оттуриға чиқти.

Шинхуа агентлиқиниң 29-майдики хәвиридә ейтилишичә, он нәччә әрәб мәмликитиниң дипломатлири шаңхәйгә җәм болуп, хитай тәмин әткән компютер "булут суписи" арқилиқ уйғур дияридики адәмләр вә шәһәрләрни екскурсийә қилған. Шундақла талланған уйғурларниң "қәлб садаси" ни аңлаш арқилиқ хитай һөкүмитиниң уйғурларни қандақ "әвзәл вә баяшат" турмуш шараитиға игә қилғанлиқини һес қилған. Болупму бу видийо көрүнүшлиридики хотән, ақсу, үрүмчи, қәшқәр қатарлиқ җайлардин кәлгән һәр саһә кишилири сөзлигән "мәҗбурий әмгәкниң пүтүнләй иғва икәнлики" һәққидики баянатлар "уйғурлар мәҗбурий әмгәккә селиниватиду" дегән хәвәрләрни инкар қилидиғанлиқи алаһидә тәкитләнгән.

Пәләстинниң бейҗиңда турушлуқ баш әлчиханисиниң мәдәнийәт хадими шади ‍әбузар бу видийоларни көргәндин кейин сөз қилип "компартийә һәр милләт хәлқини йетәкләп зор утуқларға еришипту. Ғәрбтики дүшмән күчләрниң буниңға қара сүркимәкчи болуши әмәлгә ашмас хам хиялдур" дегән.

Һалбуки өткән айда бирләшмә агентлиқ хитай һөкүмитиниң мәхсус буйруқ чүшүрүп мәҗбурий һалда уйғурларни худди юқириқидәк видйо шәклидә "майкил помпйони әйибләш" һәрикити қозғиғанлиқини хәвәр қилғаниди. Буниң билән хитай һөкүмитиниң бу җәһәттики бир зор ялғанчилиқи дуняға ашкара болған иди. Нөвәттә бу қетимқи уйғурларни видйо арқилиқ сөзлитишниңму ашу хилдики мәҗбурий орунлаштуруш икәнлики һәққидә түрлүк гуманлар оттуриға чиқмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт