Ereb döletlirining xitaydiki elchiliri “Bulut üstidin Uyghurlarni kördi”

Xitay hökümitining özini aqlash teshwiqatliridiki bir muhim halqa yéqinqi mezgillerdin buyan xitayda xizmet qiliwatqan chet'el diplomatlirini türlük pa'aliyetlerge teshkillesh arqiliq özlirining qanchilik “Köyümchan” bir hakimiyet ikenlikini pesh qilishta ipadiliniwatqanliqi melum. Bu xildiki pa'aliyetlerning biri yéqinda shangxey chet'el tilliri uniwérsitétida otturigha chiqti.

Shinxu'a agéntliqining 29-maydiki xewiride éytilishiche, on nechche ereb memlikitining diplomatliri shangxeyge jem bolup, xitay temin etken kompyutér “Bulut supisi” arqiliq Uyghur diyaridiki ademler we sheherlerni ékskursiye qilghan. Shundaqla tallan'ghan Uyghurlarning “Qelb sadasi” ni anglash arqiliq xitay hökümitining Uyghurlarni qandaq “Ewzel we bayashat” turmush shara'itigha ige qilghanliqini hés qilghan. Bolupmu bu widiyo körünüshliridiki xoten, aqsu, ürümchi, qeshqer qatarliq jaylardin kelgen her sahe kishiliri sözligen “Mejburiy emgekning pütünley ighwa ikenliki” heqqidiki bayanatlar “Uyghurlar mejburiy emgekke séliniwatidu” dégen xewerlerni inkar qilidighanliqi alahide tekitlen'gen.

Pelestinning béyjingda turushluq bash elchixanisining medeniyet xadimi shadi ‍ebuzar bu widiyolarni körgendin kéyin söz qilip “Kompartiye her millet xelqini yéteklep zor utuqlargha érishiptu. Gherbtiki düshmen küchlerning buninggha qara sürkimekchi bolushi emelge ashmas xam xiyaldur” dégen.

Halbuki ötken ayda birleshme agéntliq xitay hökümitining mexsus buyruq chüshürüp mejburiy halda Uyghurlarni xuddi yuqiriqidek widyo sheklide “Maykil pompyoni eyiblesh” herikiti qozghighanliqini xewer qilghanidi. Buning bilen xitay hökümitining bu jehettiki bir zor yalghanchiliqi dunyagha ashkara bolghan idi. Nöwette bu qétimqi Uyghurlarni widyo arqiliq sözlitishningmu ashu xildiki mejburiy orunlashturush ikenliki heqqide türlük gumanlar otturigha chiqmaqtiken.