Xitayning Uyghur élide yene bir türküm islamiy isimlarni chekligen

Radi'omizning égilishiche, xitayning Uyghur élide yene bir türküm islamiy isimlarni chekligenliki melum.

Da'iriler ilgiri xotende bir qisim islamiy isimlarni chekligen idi. Melum bolushiche, bu nöwetlik cheklesh pütün rayon miqyasida yolgha qoyulghan.

Radi'omizning ziyaritini qobul qilghan ürümchidiki bir nopus bashqurush ishxanisining saqchi xadimi bu qétim cheklen'gen isimlar ichide “Islam”, “Qur'an”, “Jihad”, “Mekke”, “Imam”,“Sadam”, “Haji” we “Menide” dégen isimlarning barliqini delillidi.

U yene, bularning xitay kommunist partiyesining “Az sanliq milletlerning isimlirini qéliplashtur mizani” boyiche cheklen'genliki bildürdi.

U mundaq dédi:“Qoyuq diniy puraqtiki isimlarni qoyalmaysiz. Mesilen ‛jihad‚ dégen'ge oxshash isimlarni.”

U yene, da'irilerning nopus bölümidiki xadimlarni bu heqte terbiyiligenlikini bildürdi.

2015-Yili xotenning toxula kenti tarqatqan cheklen'gen isimlar tizimlikige yuqirida körsitilgen bir qisim isimlarni öz ichige alghan “Seypidin”, “Pexirdin”, “Erefat” “Nesrulla”, “Muslime”, “Muxlise”, “Munise”, “Xediche” qatarliq 22 xil isim kirgüzülgen idi.

Xitay da'iriliri 1-apréldin bashlap yolgha qoyushqa bashlighan “Esebiylikni tügitish nizami” dimu “Isim tallash arqiliq diniy esebiylikini terghib qilish cheklinidu” dep körsetken idi.