Xitay da'iriliri meschit imamlirigha xitay en'eniwi örp-adetliri we tilini öginish telipi qoyghan

Muxbirimiz erkin
2019-01-09
Share

Xitay da'iriliri Uyghur rayonida musulman imam-xatiplirigha yolyoruq bérip, ulargha xitayning en'eniwi örp adetlirini we xitay tilini öginishini telep qilghan.

Xitayda chiqidighan “Yer shari waqti géziti” ning 9‏-yanwar xewer qilishiche, bu telepning qoyulushidiki meqset diniy zatlarni diniy ashqunluqqa qarshi turup, rayonning muqimliqi we güllinishige töhpe qoshushigha yéteklesh iken. Bu telep Uyghur aptonom rayonluq diniy we milliy ishlar komitétining rayondiki musulman diniy zatlargha achqan siyasiy öginish kursida otturigha qoyulghan. Bu telep xitay da'iriliri ötken shenbe küni xitaydiki 8 islam jem'iyitining mes'ullirini yighip, islamni “Xitaychilashturush” ning 5 yilliq pilanini élan qilghan mezgilde otturigha qoyulghan.

Da'iriler5 yilliq pilanning konkrét mezmunlirini ashkarilimighan bolsimu, lékin bezi közetküchiler xitayning 5 yilliq pilani islamdiki halal-haram, nikah, zakat, roza, hijap dégendek musulmanlarning xitay jem'iyitige assimilyatsiye bolushigha tosalghu dep qaralghan bezi tüp prinsiplirini bikar qilishqa qaritilghanliqini ilgiri sürmekte.

“Yer shari waqti géziti” ning xewiride ashkarilishiche, 1‏-yanwar küni ürümchide bashlan'ghan siyasiy öginish kursida musulman diniy zatlirining “En'eniwi xitay örp-adetliri, xitay kompartiyesining tarixi, bolupmu xitay we shinjangning hazirqi zaman tarixi we xitay tilini öginishi telep qilin'ghan.”

8‏-Yanwar küni xitay kompartiyesi merkizi birliksep bölümining torida élan qilin'ghan bu bayanatta musulman diniy zatlirining “Radikal diniy idiyelerge qarshi turushi, inaqliqni algha sürüshi, étiqadchi ammining milliy ittipaqliqni köz qarchughani asrighandek asrishi we öz hayatini qoghdighandek qoghdishigha yétekchilik qilishi kérekliki” tekitligen.

“Yer shari waqti géziti” ning bildürüshiche, xitay islam jem'iyiti yéqinda diniy zatlarning herikitige da'ir bir nizam maqullighan. Xitay islam jem'iyitining mu'awin re'isi jin rubin “Bu nizamda musulman diniy zatlirining herikiti ölchemleshtürülgenliki” ni bildürgen. Lékin Uyghur pa'aliyetchilirining ilgiri sürüshiche, bu nizam diniy zatlarning 5 yilliq pilan boyiche islamdiki bezi tüp diniy prinsiplarni özgertishke qarshi türüshini kontrol qilip, ularning 5 yilliq pilan'gha maslishishini qolgha keltürüshni meqset qilghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet