Uyghur aptonom rayonluq partkom “Shinjangda islamni xitaychilashturushta ching turush” ni yene tekitligen

Muxbirimiz erkin
2022-02-11
Share

Uyghur aptonom rayonliq partkom 10-féwral da'imi komitétning yighini chaqirip, “Shinjangda islamni xitaychilashturushta dawamliq ching turush” ni tekitligen.

Xitay taratqulirining xewer qilishiche, yighinda yene étiqatchi ammini bashqurush, dinni sotsiyalistik jem'iyetke maslashturushni dawamliq algha sürüsh telep qilin'ghan. Ma shingruy ‍ötken yili 12-‍ayning axiri Uyghur aptonom rayonluq partkomning sékritarliqigha yötkep kélin'gende, asasiy nishanning iqtisadiy tereqqiyatqa qaritidighanliqi éytqan bolsimu, biraq kéyinki waqitlarda u chén chüen'go dewridiki “Islamni xitaychilashturush”, “Jongxu'a milliti ortaq gewdisi éngini turghuzush” dégen uqumlarni téximu köp tekitleshke bashlighan.

“Shinjang géziti” ning xewer qilishiche, Uyghur aptonom rayonluq partkomning da'imiy komitét yighinda “Sotsiyalistik ilghar medeniyetning algha ilgirilesh yölinishide ching turup, shinjangni medeniyet bilen sughurush qurulushini téximu chongghur qanat yaydurush, her qaysi millet kadir ammisining meniwiy dunyasini üzlüksiz béyitip we toluqlap, jongxu'a milliti ortaq gewdisi tonushini shekillendürüsh, shinjangda islamni xitaychilashturush yölinishide ching turup, étiqatchi ammini dölet tonushi, puqraliq tonushi, qanun tonushi shekillendürüshke yéteklesh, dinni sotsiyalistik jem'iyetke maslashturushni algha sürüsh kérek,” déyilgen.

Közetküchilerning éytishiche, xitay hökümiti Uyghur rayonidiki “Irqiy qirghinchiliq” we “Insaniyetke qarshi jinayet” lirini toxtitish toghriliq amérika qatarliq gherb ellirining qattiq bésimigha uchrisimu, biraq xitay kompartiyesi özining siyasitini dawamlashturushta ching turmaqta iken. Yéqinda xitay b d t kishilik hoquq aliy komissarining Uyghur élini ziyaret qilishigha yol qoyudighanliqi, biraq ziyaretning “Tekshürüshni meqset qilmasliqi” ni éytqan. “Shinjang géziti” ning éytishiche, Uyghur aptonom rayonluq partkomning bu qétimliq da'imiy komitét yighinida, yighin qatanshchiliri shi jinpingning yéqinda qilghan bir qatar sözlirini ögen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet