Италийәдә сақчилар билән хитай көчмәнлири тоқунушти

Мәлум болушичә, италийәниң флоренса шәһири сесто фийорентино районида, сақчилар билән хитай көчмәнлири арисида тоқунуш йүз бәргән. Мәзкур вәқә һәққидә хитайниң йәр шари вақти гезити вә италийә таратқулири пәрқлиқ хәвәр бәргән. Хәвәрләрдә көрситилишичә, вәқә 29 -июн кәчтә башлинип, 30-июн сәһәрдә бесиққан. Вәқәдә икки хитай ишчиси қолға елинған.

“йәр шари вақти” гезитиниң 30 -июндики хәвиридә 29 -июн чүштин кейин флоренса сақчилири бир завутни тәкшүрүшкә кәлгәндә, хитай ишчилири билән сақчилар арисида сүркилиш йүз берип, вәқәниң тәрәққияти сақчилар билән хитай ишчилири арисидики тоқунушқа айланғанлиқи хәвәр қилинған. Хәвәрдә йәнә флоренса шәһиридики хитай консулиниң вәқәгә арилашқанлиқи вә италийә һөкүмитидин сақчиларниң қанунни әдәп билән иҗра қилишни, хитай пуқралириниң һәқ -һоқуқини қанун бойичә қоғдашни тәләп қилғанлиқи баян қилинған.

Әмма “йәр шари вақти” гезитиниң хәвиридә, завутниң қандақ завут икәнлики, ишчилар билән сақчилар арисида тоқунушниң немә сәвәбтин йүз бәргәнлики һәққидики тәпсилатлар берилмигән.

Италийә анса хәвәр агентлиқиниң мәзкур вәқә һәққидики хәвиридә болса, хитай ишчиларниң завутниң иҗазәтнамисини тәкшүрүшкә кәлгән италийә сақчилириға қаршилиқ көрсәткәнлики әскәртилип, вәқәниң чоңийишиға, икки тәрәп оттурисидики талаш-тартишта бир хитай ишчиниң сақчиларға қаршилиқ көрситиштә қолидики 10 айлиқ бовақни қалқан қилип пайдиланғанда, балиниң униң қолидин чүшүп кәткәнлики сәвәб болғанлиқи тилға елинған. Мәлум болушичә, йеқинқи йиллардин буян дуняниң һәр қайси җайлирида ишләватқан хитай ишчилири билән йәрлик аһалиләр вә сақчилар арисида өз ‏-ара тоқунушидиған һадисиләр көрүнәрлик көпәйгән. Хитай вәзийәт анализчилири бундақ вәқәләргә хитай көчмәнлириниң бу дөләтләрниң қануниға хилап һалда қурған сахта тавар ишләш завутлири яки хитай ширкәтлириниң йәрлик ишчиларниң қануний һәқлирини аяқ-асти қилғанлиқи қатарлиқ амиллар сәвәб болғанлиқини илгири сүрмәктә.