Italiye parlaménti bilen hökümet arisida xitayning irqiy qirghinchiliq jinayitini békitish mesiliside talash-tartish kélip chiqqan

Amérikaning tesiri bilen kanada, gollandiye parlaménti xitayning Uyghurlargha élip barghan jinayitini “Irqiy qirghinchiliq” dep békitkendin kéyin, en'giliye, fransiye, italiye parlaméntliri bilen hökümet arisida bu heqte munaziriler dawam qilmaqta iken.

Yawropa ittipaqining “Siyasetchi” tori 6-aprél élan qilghan bir xewerde éytilishiche, italiye parlaménti xitayning jinayitini “Irqiy qirghinchiliq” dep békitish mesiliside italiye birleshme hökümitige bésim qilghan؛ hökümettikiler bolsa xitayning Uyghur rayonidiki kishilik hoquq depsendilikini eyiblisimu, uni “Irqiy qirghinchiliq” dep atashqa qarshi chiqqan. Ularning köpinchisi hökümettiki sol qanat guruppa bolup, özlirining bu heqtiki qararini otturigha qoyup, xitay bilen diplomatik toqunush peyda qilishtin saqlinishni teshebbus qilghan. Italiye birleshme hökümiti yéngidin bir layihe tüzüp, “Irqiy qirghinchiliq siyasiti” dégen sözni bikar qilip, uning ornigha “Kishilik hoquq depsendichiliki” dep atash teklipi bermekchi bolghan.

Xewerde körsitilishiche, gollandiye parlaméntidiki lébrallar we sol qanat guruppa xitayning jinayitini “Irqiy qirghinchiliq” dep békitishni teshebbus qilghan bolsa, italiye parlaménti we hökümettiki ong qanat guruppa u jinayetni choqum shundaq atashni teshebbus qilghan. Bu ehwal italiye hökümitidiki ong qanat guruppa bilen sol qanat guruppining bölünüshini keltürüp chiqarmaqta iken.

Italiye parlaménti awam palatasi tashqi ishlar komitéti charshenbe küni (7-aprél) Uyghur rayonida yüz bériwatqan kishilik hoquq depsendichilikini “Irqiy qirghinchiliq” dep békitish üchün bélet tashlaydiken.