Италийә парламенти билән һөкүмәт арисида хитайниң ирқий қирғинчилиқ җинайитини бекитиш мәсилисидә талаш-тартиш келип чиққан

• Мухбиримиз җәвлан
  2021-04-07

Американиң тәсири билән канада, голландийә парламенти хитайниң уйғурларға елип барған җинайитини “ирқий қирғинчилиқ” дәп бекиткәндин кейин, әнгилийә, франсийә, италийә парламентлири билән һөкүмәт арисида бу һәқтә муназириләр давам қилмақта икән.

Явропа иттипақиниң “сиясәтчи” тори 6-апрел елан қилған бир хәвәрдә ейтилишичә, италийә парламенти хитайниң җинайитини “ирқий қирғинчилиқ” дәп бекитиш мәсилисидә италийә бирләшмә һөкүмитигә бесим қилған; һөкүмәттикиләр болса хитайниң уйғур районидики кишилик һоқуқ дәпсәндиликини әйиблисиму, уни “ирқий қирғинчилиқ” дәп аташқа қарши чиққан. Уларниң көпинчиси һөкүмәттики сол қанат гуруппа болуп, өзлириниң бу һәқтики қарарини оттуриға қоюп, хитай билән дипломатик тоқунуш пәйда қилиштин сақлинишни тәшәббус қилған. Италийә бирләшмә һөкүмити йеңидин бир лайиһә түзүп, “ирқий қирғинчилиқ сиясити” дегән сөзни бикар қилип, униң орниға “кишилик һоқуқ дәпсәндичилики” дәп аташ тәклипи бәрмәкчи болған.

Хәвәрдә көрситилишичә, голландийә парламентидики лебраллар вә сол қанат гуруппа хитайниң җинайитини “ирқий қирғинчилиқ” дәп бекитишни тәшәббус қилған болса, италийә парламенти вә һөкүмәттики оң қанат гуруппа у җинайәтни чоқум шундақ аташни тәшәббус қилған. Бу әһвал италийә һөкүмитидики оң қанат гуруппа билән сол қанат гуруппиниң бөлүнүшини кәлтүрүп чиқармақта икән.

Италийә парламенти авам палатаси ташқи ишлар комитети чаршәнбә күни (7-апрел) уйғур районида йүз бериватқан кишилик һоқуқ дәпсәндичиликини “ирқий қирғинчилиқ” дәп бекитиш үчүн беләт ташлайдикән.