Türkiyede jasusluq jinayiti bilen tutulghan alte gumandarning qilmishliri ashkarilandi

Washin'gtondin muxbirimiz jewlan teyyarlidi
2024.02.28

Istanbul jumhuriyet bash teptishliki 20-féwral küni bashlighan herikette, xitaygha jasusluq qilish bilen eyiblinip tutqun qilin'ghan alte gumandarning qilmishliri ashkarilan'ghan.

“Xewer türk” téléwiziyesi 28-féwral küni élan qilghan xewerge qarighanda, xitaygha jasusluq qilghan bu alte gumandardin sadiq memet'ezizning xitay dölet xewpsizliki idarisining xadimi, qaghiliq nahiyelik partkomning mu'awin sékrétari “Li” bilen körüshkenliki, eslide uning 2000-yillardin bashlapla xitay saqchi da'iriliri jasusliridin “Mutiwulla” we “Alimjan” isimlik jasuslar bilen téléfonda alaqiliship turghanliqi ashkarilan'ghan hemde istanbul bash teptishlikige yollan'ghan doklatta qeyt qilin'ghan.

Türkiye istixbaratining delillishige köre, sadiq memet'eziz xitay jasusliri bilen yüz turane körüshüsh üchün 2023-yil xongkonggha, arqidin qeshqer qaghiliq nahiyesige barghan. U yerde “Li” famililik jasus we “Alimjan” bilen körüshken. Uningdin kéyin, se'udi erebistanining jidde shehiride “Alimjan” bilen qayta körüshken؛ her qétim körüshkende, sherqiy türkistan teshkilatlirining yighinliri, türkiyede tonulghan siyasiy pa'aliyetchiler we jama'et erbablirining turalghu jayi we ish-pa'aliyetliri heqqide toplighan uchurlirini teminligen. U yene xitay jasusluq organlirining buyruqi bilen, türkiyediki jama'et erbabi abduqadir yapchan bilen yéqin olturush üchün 2023-yil 1-ayda bashaqsheherdin öy izdigen. Zeytinburnuda nawayliq qiliwatqan abdullani süriyediki Uyghurlar heqqide uchur toplashqa salghan. U yuqiriqi jasusluq pa'aliyetliri üchün xitaydin jem'iy 22 ming dollar pul alghan.

Gumandarlardin hebibulla ürümchi, “Alimjan” din alghan pulni sadiq memet'ezizge yetküzüp bérishte wasitichilik qilghan. Uningdin bashqa, gumandarlardin hashim sabit'oghli umre hej qilish bahaniside se'udi erebistan'gha bérip, xitaydin alghan pulni “Tijaret” nami bilen sadiq memet'ezizge bergen. Gumandarlardin abdulla nasir bursadiki bir méhmanxanida “Shö gangjung” isimlik bir xitay jasusi bilen köp qétim körüshken.

Nöwette bu délo yene dawamliq tekshürüp delillesh basquchida iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.