"Shinjang jaza lagérliri" ni pash qilghan xitay pa'aliyetchi "Térrorluq", "Esebiylik" ni terghib qilish bilen eyiblen'gen

Muxbirimiz erkin
2020-01-14
Élxet
Pikir
Share
Print

Ijtima'iy taratqularda "Shinjang jaza lagérliri" gha da'ir uchur yollighan xitay pa'aliyetchi jang bawchéng "Térrorluq", "Esebiylik" ni terghib qilish bilen eyiblinip sotqa tartilghan. Jang bawchéng ötken yili 4‏-iyun harpisida qolgha élinip, béyjingdiki féngtey qamaqxanisigha qamalghanidi.

Jang bawchéngning ayalining radiyomizgha bildürüshiche, da'iriler yéqinda jang bawchéngni resmiy eyibligen. Eyibnamide, u 2018-we 2019‏-yillirida ijtima'iy taratqularda mezmuni xata pikirlerni yézip, dölet rehberlirige qara sürkeydighan, partiye-hökümetke qarshi, bölgünchilikke alaqidar, edliye organlirini tillaydighan mezmunlarni yollash, térrorluq, esebiylikke alaqidar uchurlarni tarqitish bilen eyiblen'gen. Jang bawchéngning ayali 14‏-yanwar radiyomizgha bergen uchurida, yoldishining ilgiri twittirda "Shinjang jaza lagérliri" gha da'ir uchurlarni yollighanliqi, shundaqla uning türmidiki bezi xitay öktichilirining a'ilisige yardem qilghanliqini bildürgen.

Amérikadiki "Changsha funing" namliq xitay teshkilatining qurghuchisi yang jenqing, jang bawchéngning ilgiri türmidiki xitay öktichisi xu'ang chining anisining béyjinggha kélip, erz qilishigha yardem qilghanliqi, shundaqla uning twittirda "Shinjang jaza lagérliri" gha da'ir uchurlarni yollighanliqini tekitligen. U, 14‏-yanwar radiyomizning bu heqtiki ziyaritini qobul qilghanda, jang bawchéngning herikiti xitay da'irilirini bi'aram qilghanliqini bildürgen. Uning tekitlishiche, jang bawchéngning lagérlar heqqidiki uchuri "Hökümetning térrorluq qilmishini pash qiliwetkenlik bilen oxshash" iken.

Yang jyenféng, "Uning bu uchurlarni pash qilishi térrorluq emes. U xitay da'irilirining shinjangdiki qilmish-etmishlirini pash qildi. Bu uning zerbe bérishke uchrishidiki seweb bolushi mumkin" dégen. Bu, jang bawchéning tunji qétim tutqun qilinip, sotqa tartilishi emes. U 2013‏-yili, "Yéngi puqralar herikiti" qozghighan hökümet emeldarlirining mal-mülkini ashkarilash pa'aliyitige qatniship bir qétim qolgha élin'ghan. U shu qétimda "Adem toplap ammiwi tertipke buzghunchiliq qilish" bilen eyiblinip, 2 yilliq késilgenidi.

Toluq bet