Marko rubiyo jenubiy déngizda igilik hoquq kürishi qiliwatqan döletlerning tashqiy ishlar ministirliri bilen körüshken
2025.01.23
Amérika tashqi ishlar ministiri marko rubiyo 23-yanwar peyshenbe küni jenubiy déngizda xitay bilen igilik hoquq detalishi qiliwatqan hindonéziye we filippin qatarliq döletlerning tashqiy ishlar ministirliri bilen téléfonda körüshken.
Amérika tashqiy ishlar ministirliqining bayanatchisi temmiy brusning muxbirlargha bergen bayanatidin melum bolushiche, marko rubiyo hindonéziye tashqiy ishlar ministiri sugyono bilen téléfon arqiliq körüshüp, nuqtiliq halda jenubiy déngizning xewpsizlik mesilisi heqqide sözleshken.
Temmiy brus mundaq dégen: “Ikki terep amérika we hindonéziyening uniwérsal istratégiyelik shériklik munasiwitining bixeter we güllen'gen hindi-tinch okyan rayoni üchün qanchilik muhimliqini tonup yetti. Ular yene ikki döletke paydiliq sahelerdiki soda we meblegh sélish alaqisini chongqurlashturushqa wede berdi”.
Melum bolushiche, amérika tashqiy ishlar ministiri marko rubiyo shu küni yene filippin tashqiy ishlar ministiri énrik manalo bilenmu téléfonliship, xitayning jenubiy déngizdiki ighwagerchilik heriketliri üstide söhbetleshken we hemde amérikaning filippinning igilik hoquqini qoghdaydighanliqini tekitligen.
Xitay terep amérika tashqiy ishlar ministiri marko rubiyoning hindonéziye we filippin tashqiy ishlar ministirliri bilen körüshkende éytqan sözliridin qattiq narazi bolghan. Xitay tashqiy ishlar ministirliqining bayanatchisi maw ning 23-yanwar künidiki bayanatida, “Amérika jenubiy déngiz mesilisidiki biwasite dölet emes, uning xitay bilen filippin otturisidiki déngiz mesilisige arilishish hoquqi yoq” dégen.
Maw ning shu kündiki bayanatida yene, amérika filippin'gha yéngidin orunlashturghan “Teyfing bashqurulidighan bomba qoyup bérish sistémisi” nimu tenqid qilip, “Istratégiyelik hujum xaraktérini alghan bu sistémining ornitilishi, rayondiki jiddiylikni kücheytiwétidighan, shundaqla gé'o-siyasiy qarshilishishni keltürüp chiqiridighan xeterlik herikettur” dep atighan.
Amérika tashqi ishlar ministiri marko rubiyo wezipige olturupla amérikaning hindi-tinch okyan rayonidiki shérik döletliri bilen bolghan uchrishishlirini bashlighan. Herqaysi axbaratlar bu heqtiki xewerliride buni amérikaning xitayning rayondiki kéngeymichilikini cheklesh diplomatiyesi, dep bahalimaqta.