Mayk pompéyo xitayning jenubiy déngizda tosalghu bolushigha yol qoymaydighanliqini bildürgen

Muxbirimiz irade
2019-03-01
Élxet
Pikir
Share
Print

Amérika tashqi ishlar ministiri mayk pompéyo amérikaning jenubiy déngizning xelq'aragha ochuq bolushigha kapaletlik qilidighanliqini, xitayning buninggha tosalghu bolushigha yol qoymaydighanliqini bildürdi.

Birleshme agéntliqning xewiridin qarighanda, amérika tashqi ishlar ministiri mayk pompéyo jüme küni filippin paytexti manilada qilghan sözide yene, eger filippinning herbiy küchliri, ayropilan we paraxotliri jenubiy déngizda qoralliq hujumgha uchrisa, amérikaning filippinni qoghdaydighanliqini bildürgen.

Xewerde éytilishiche, bu, amérikaning uzun yillardin béri tunji qétim jenubiy déngizdiki shérik döletlirige bu heqte ochuq we keskin wede bérishi bolup hésablinidiken. Kéler hepte filippinning dölet mudapi'e ministiri delfin lorénzana amérika dölet mudapi'e ministirliqini ziyaret qilidighan bolup, bu uchrishishning meqsitimu amérika bilen shérik döletler arisidiki herbiy alaqini kücheytishke munasiwetlik iken.

Xitayning jenubiy we sherqiy déngizdiki igilik hoquq dewasidiki keskin pozitsiyesi rayondiki döletlerning naraziliqini we xitayning kéngeymichiliki heqqidiki endishilirini kücheytken idi.

Mayk pompéyo bolsa maniladiki sözide: "Xitayning jenubiy déngizdiki sün'iy aral qurulushi we herbiy pa'aliyetliri silerning igilik hoquqinglar, bixeterlikinglar, jümlidin iqtisadiy hayatinglargha tehdit peyda qilmaqta. Bu, amérika üchünmu tehdit hésablinidu" dep eskertken.

Toluq bet