Xitay jenubiy déngizdiki sün'iy arallarda herbiy eslihelirini qurghan

Muxbirimiz erkin
2016-12-14
Élxet
Pikir
Share
Print

Xitay hökümiti jenubiy déngizning igilik hoquq talash-tartishtiki sün'iy arallarda chong kölemlik bir qanche herbiy mudapi'e eslihelirini qurghan. Asiyadiki déngiz okyan ishlirini közitidighan bir amérika tetqiqat ornining charshenbe küni élan qilghan sün'iy hemra resimliridin melum bolushiche, xitay sépratil taqim arallirigha qarashliq 7 sün'iy aralning hemmiside herbiy istihkamlarni qurup, nurghun chong tipliq zembirek we kichik kölemlik bashqurulidighan bomba sistémilirini orunlashturghan.

Bu yil 7-aydin béri, sün'iy hemra arqiliq bu arallardiki herbiy eslihelerni razwétka qilip kéliwatqan mezkur tetqiqat orni bu ehwalni charshenbe küni élan qilghan doklatida ashkarilidi.

Mezkur organ doklatida, xitayning bu arallarda herbiy qomandanliq merkizi we mudapi'e téxnika eslihelirini orunlashturghanliqini bildürgen. Uning qeyt qilishiche, xitay bu herbiy eslihelerni özining bu arallardiki hawa armiye baziliri hujumgha uchrap qalsa, axirqi mudapi'e sépi qilip qollinishi mumkin.

Mezkur organ bu yil 6 we 7-aylardin bashlap, bu xil herbiy mudapi'e eslihelirining fériy kros, mischéf, subi qatarliq sün'iy arallarda bayqalghanliqini, hazir bu eslihelerning gawén, hugés, jonson, ku'artéron sün'iy arallirida quruliwatqanliqini ilgiri sürgen.

Buningdin burun xitayning fériy kros, subi, mischéf xada tash arallirini tindurup, urush ayropilanlirining uchush yollirini yasighanliqi ashkarilan'ghan idi. Amérika tetqiqat ornining bildürüshiche, xitay bu eslihelerni mudapi'e xaraktérlik désimu, emma uninggha zembirek we yéqin musapiliq qorallarni orunlashturushi kelgüsi toqunushqa teyyarliq qiliwatqanliqini körsitidiken.

Toluq bet