Xitay jenubiy déngizda amérikining bir su asti tekshürüsh eswabini qolgha chüshürüwalghan

Xitay déngiz armiyesi 15‏-dékabir jenubiy déngizda amérikining bir ademsiz su asti tekshürüsh eswabini qolgha chüshürüwalghan. Amérika hökümet emeldarlirining bildürüshiche, amérika terep xitaydin su asti tekshürüsh eswabini qayturup bérishni resmiy telep qilghan.

Amérika dölet mudapi'e ministirliqining bayanatchisi jef deywis jüme küni muxbirlargha uchur bérip, mezkur ademsiz su asti tekshürüsh eswabining jenubiy déngizda qanunluq herbiy ölchem meshghulati élip bériwatqanliqini bildürdi. U, “Bu igilik hoquqluq bir eswab, uningda in'glizche qilip, bu amérika dölet mülki, uni su yüzige chiqirishqa bolmaydu dep yézilghan” dep körsetti.

Amérika emeldarlirining bildürüshiche, bu weqe amérikining “Bawdich” namliq déngiz tekshürüsh paraxoti mezkur eswabni süzüwélishqa teyyarliq qiliwatqan mezgilde yüz bergen. Amérika terep, weqe filippinning subik qoltuqining 80 kilométir gherbiy shimalida yüz bergenlikini bildürdi.

Amérika dölet mudapi'e ministirliqining bayanatida körsitishiche, xitay déngiz armiyesining ASR 510 tipliq bir paraxoti amérikining “Bawdich” namliq paraxotigha yéqinliship, andin kichik tipliq bir paraxot bilen su asti tekshürüsh eswabini tutuwalghan. “Bawdich” namliq paraxot simsiz apparat arqiliq xitay paraxoti bilen alaqe qurup, tekshürüsh eswabini derhal qayturup bérishni telep qilghan bolsimu, emma xitay terep perwa qilmighan.

Amérika dölet mudapi'e ministirliqi bayanatchisi jef deywis, “Bu, biz tesewwur qilalaydighan kespiy déngiz armiyesining herikiti emes” dégen.