Xitay awi'amatkisining jenubiy déngizdiki sezgür su rayonigha kirishi teywen bilen yaponiyeni jiddiyleshtürgen

Melum bolushiche, xitayning “Lyawning” namliq awi'amatkisi 26-dékabir küni filippin bilen teywen ariliqidiki talash-tartish boluwatqan sezgür su rayonigha üsüp kirgen. Bu hal teywen, yaponiye qatarliq ellerni jiddiyleshtürüp, ularning mezkur su rayonigha bolghan sezgürlükini yenimu ashurghan.

Teywen dölet mudapi'e ministirliqi bügün jiddiy bayanat élan qilip, xitayning “Lyawning” namliq awi'amatkisining 5 dane qoghdighuchi urush paraxotining himayiside teywen arilining jenubigha 90 mil kélidighan su rayonigha üsüp kirgenlikini bildürgen.

Halbuki, xitay tashqi ishlar ministirliqining bayanatchisi xwa chünying bu heqte inkas qayturup: “Bu qétimliq manéwir ‛lyawning‚ namliq awi'amatkining ochuq déngizda jeng qilish iqtidarini sinash üchün élip bérilghan. Uning jenubiy déngizdiki herikitining xelq'ara qanun'gha xilap héchqandaq yéri yoq” dégen.

Teywen da'iriliri “‛lyawning‚ namliq awi'amatkining bu qétimliq herikiti emeliyette xitayning amérikigha bériwatqan bir signalidur. Uning heriket da'irisi alliqachan teywen bilen yaponiyening déngiz térritoriyesige bösüp kirdi” dégen.

Yaponiye terepmu “Lyawning” namliq awi'amatkining yürüsh da'irisi yaponiyening miyako we okinawa arallirigha yéqinlashti, yaponiye eng jiddiy halette uning herikitini közetmekte, dégen.