Amérika tinch okyandiki ittipaqdashlirini jenubiy déngizdiki herbiy küchini kücheytishke chaqirdi

Muxbirimiz erkin
2018-12-28
Élxet
Pikir
Share
Print

Amérika dölet mudapi'e ministirliqi uning tinch okyandiki ittipaqdashlirini jenubiy déngizdiki herbiy küchini kücheytip, xitaygha taqabil turushqa chaqirghan.

Bu chaqiriqni amérika dölet mudapi'e ministirliqining asiya-tinch okyan ishlirigha mes'ul yardemchi ministiri rendiy shraywér "Awstraliye" gézitining ziyaritini qobul qilghanda tekitligen.

Rendiy shraywér "Méningche xitaygha téximu yoshurun bésim peyda qilishning yoli shériklirimiz we ittipaqdashlirimizning bu rayondiki birleshme heriketlerge ishtirak qilishidur. . . . Ular déngiz qatnash erkinlikini qoghdash meshghulatlirigha qatnishalmisimu, lékin ularning birleshme charlash we ortaq heriketke teyyar turushidur" dégen.

Xitayning jenubiy tinch okyandiki aral döletlirining ul eslihelirini meblegh bilen teminlesh, yerlik siyasetchilerge pul i'ane qilish qatarliq heriketliri awstraliye we yéngi zélandiyening diqqitini qozghap kelgen idi.

Rendiy shraywér "Awstraliye" gézitige qilghan sözide, xitayning jenubiy tinch okyanda herbiy baza qurush pilani bar bolushi mumkinlikini agahlandurghan. Amérikining jenubiy déngizdiki erkin déngiz qatnishini qoghdash herikiti xitayning bu rayondiki zémin telipi we herbiy eslihelirige xiris qilip, bezide ikki terep herbiy paraxotlirining öz ara tirkishish weqelirini peyda qilip keldi.

Bu yil 8‏-ayda xitayning urush paraxoti sipratil taqim arallirining etrapida amérikining "Dékotér" namliq urush paraxotigha soqulup kétishke tasla qalghan idi.

Rendiy shraywér "Awstraliye" gézitige yene amérikining en'gliye, firansiye, kanada qatarliq ittipaqdashlirining jenubiy déngizdiki herbiy pa'aliyitini kücheytkenlikini bildürüp, chünki ular "Jenubiy déngizda xelq'ara qanun we ölchemlerge xilapliq qilishning yer shari tesirini tonup yetmekte" dégen.

Awstraliye bilen yéngi zélandiye yéqindin béri xitaygha bolghan sezgürlükini kücheytken. Her ikki dölet xitayning xu'awéy shirkitining 5G intérnét qurulushigha ishtirak qilishini chekligen idi.

Toluq bet