Uyghur, tibet teshkilatliri jüme küni jenwede xitaygha qarshi namayish qildi

Muxbirimiz erkin
2016.09.16
Share on WhatsApp
Share on WhatsApp

Jüme küni, alahazel birer mingdek Uyghur, tibet we ularni qollaydighan yawropaliq pa'aliyetchi we siyasetchiler shiwétsariyening jenwe shehiridiki b d t binasi aldida namayish qilip, xitayning Uyghur, tibet rayonliridiki kishilik hoquq depsendichilikige naraziliq bildürdi.

Mezkur pa'aliyetni d u q bilen xelq'ara tibet herikiti birge teshkilligen bolup, jenwe waqti sa'et 11:00 de bashlan'ghan namayish 2 sa'et dawam qilghan. Jenwe shehiridiki palas wilson dégen jaydin yolgha chiqqan namayishchilar 2 kilométirdek musapini bésip, b d t binasining aldigha kélip toxtighan.

Bu yerde, d u q re'isi rabiye qadir xanim, tibet teshkilatining wekili, yawropa parlaméntining Uyghur, tibetlerni qollaydighan bezi ezaliri, yawropadiki kishilik hoquq teshkilatlirining mes'ulliri nutuq sözlep, xitayning kishilik hoquq xatirisi we uning Uyghur, tibet rayonliridiki siyasiy, diniy basturushini tenqid qilghan. B d t din, nopuzini qollinip, xitaygha basturushni toxtitish heqqide bésim qilishni telep qilghan.

D u q ning bildürüshiche, bu namayishning yene bir meqsiti xitayning ammiwi teshkilatlarning b d t kishilik hoquq kéngishige oxshash xelq'ara sehnilerde söz qilishini cheklesh urunushigha naraziliq bildürüshken.

D u q buningdin bir qanche hepte awwal uqturush chiqirip, her qaysi ellerdiki, bolupmu yawropa elliridiki Uyghurlarni jenwege kélip bügünki namayishqa qatnishishqa chaqirghan. Melum bolushiche, bügünki namayishqa gollandiye, gérmaniye norwégiye, shiwétsiye qatarliq döletlerdin 4 aptobusta Uyghurlar kélip qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.