Jewher ilham “Erkinlik teshebbuschisi” mukapatigha érishti

Washin'gtondin muxbirimiz irade teyyarlidi
2024.01.18

Uyghur mejburiy emgikige qarshi turush üchün tinimsiz xizmet qiliwatqan jewher ilham “Erkinlik teshebbuschisi” mukapatigha layiq körülgen.

Bu mukapat xelq'aradiki qul emgikige qarshi turush xizmetliridiki nopuzluq teshkilatlarning biri bolghan “Erkinlik birleshmisi” (Freedom United) teshkilati teripidin tesis qilin'ghan. Ular mukapat heqqidiki uqturushida jewher ilhamning xizmetlirige yuqiri baha bérip mundaq dégen:

“Jewher ilhamning Uyghurlarning mejburiy emgikini tügitish yolida boshashmay körsitiwatqan tirishchanliqi eslide xitayda ‛bölgünchilik‚ jinayiti bilen eyiblinip muddetsiz qamaq jazasigha höküm qilin'ghan dadisi, Uyghur alimi ilham toxti üchün qilghan pa'aliyiti bilen bashlan'ghan. Gerche jewher dadisini qutquzush meqsitige téxi yételmigen bolsimu, emma uning mejburiy emgek mesilisi heqqidiki xizmetliri xitay hökümitige bésim peyda qildi.”

“Erkinlik birleshmisi” teshkilati uqturushida yene mundaq dégen: jewher ilhamning “Murekkep we keng kölemlik Uyghur mejburiy emgek sistémisi heqqide teyyarlighan yuqiri sewiyelik doklatliri we pa'aliyetchiliki xelq'arada Uyghur mejburiy emgiki bilen bulghan'ghan mehsulatlarning import qilinishining aldini élishta yenimu qattiq tedbirlerning chiqirilishigha türtke boldi”.

Jewher ilham 1994-yili 7-ayning 1-küni béyjingda tughulghan bolup, bashlan'ghuch, toluqsiz we toluq ottura mekteplerni béyjingda oqughan. U 2013-yili dadisi ilham toxtining ayrodromda qolgha élinishi bilen yalghuz amérikagha kelgendin buyan toxtimay tiriship, amérikadiki indi'ana uniwérsitétini 2019-yili siyasiy penler, yéqin-sherq medeniyet we til tetqiqati we merkiziy yawro-asiya tetqiqati boyiche birla waqitta bakalawrliq unwani bilen püttürgen.

Jewher ilham, 2020-yilidin bashlap merkizi washin'gtondiki ishchilar hoquqi birleshmisi (Worker Rights Consortium) de xizmetke bashlighan. U özining pa'aliyetliri bilen Uyghurlarning chet'ellerdiki küchlük awazi bolup qalghanidi.

Jewher ilham bu mukapat heqqide “X” ke yazghan inkasida özining ötken 10 yil mabeynide dadisi ilham toxtigha wakaliten nurghun mukapatlarni qobul qilghanliqini, emma bu mukapatning tunji qétim özining xizmiti üchün bérilgen mukapatliqini éytip, yuqiridiki organ'gha teshekkürini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.