Jewher ilham, sofiye richardson: “Xelq'araning tirishchanliqi bolghandila xitayning jinayitini toxtatqili bolidu”

• Muxbirimiz jewlan
  2021-05-17

Xitayning Uyghur rayonidiki jinayiti yoshurunluqtin ashkariliqqa, ashkariliqtin “Irqiy qirghinchiliq” dep békitilishkiche dawam qilghan bu 4 yilda xitay hökümiti jinayettin qolini héch tartip baqmidi, lagérlarmu taqalmidi. Xitay zawutliri Uyghurlarni keng kölemde qul qilishni dawamlashturmaqta.

16-May küni “Muhapizetchi” gézitide kishilik hoquq pa'aliyetchisi jewhem ilham bilen kishilik hoquqni közitish teshkilatining xitay ishlirigha mes'ul diréktori sofiye richardson xanimning “Xelq'ara jem'iyetning tirishchanliqi bolghandila xitayning shinjangdiki jinayetlirini ayaghlashturghili bolidu” namliq maqalisi élan qilin'ghan bolup, xitayning Uyghur rayonidiki irqiy qirghinchiliq jinayitini toxtitish üchün xelq'ara jem'iyetning bir niyet, bir meqsette qet'iy heriketke kélishi kérekliki tekitlen'gen.

Maqalide mundaq déyilgen: “Her qaysi dölet hökümetliri we birleshken döletler emeldarliri ichide xitayning qilmishini eyibleydighanlar köpiyiwatidu. Amérika, yawropa ittipaqi, en'giliye, kanada xitaygha ilgiri körülmigen jaza tedbirliri yolgha qoydi. ‛Uyghur rayonidiki mejburiy emgekni ayaghlashturush ittipaqi‚ qatarliq teshkilatlarmu xitayning jinayi qilmishidin nep éliwatqan karxanilargha bésim qiliwatidu. Halbuki, irqiy qirghinchiliq jinayiti xelq'arada éghir jinayet dep qarilidu. Her qaysi dölet hökümetliri we birleshken döletler teshkilati Uyghur rayonida choqum tekshürüsh élip bérishi kérek؛ eger xitay hökümiti öz dölitining ichide buninggha tosqunluq qilsa, xitay dölitining sirtidin ispat toplishi kérek”.

Maqalide yene xitaydiki kishilik hoquq jinayetlirining tolimu köp hem murekkep ikenliki, shunga xelq'ara jem'iyetning birliship xitaydiki irqiy qirghinchiliqni toxtitish ishining asan'gha toxtimaydighanliqi, buning uzun hem riqabetke tolghan bir jeryan bolidighanliqi otturigha qoyulghan.