Uyghur aptonom rayonliq jama'et xewpsizlik nazaritining mu'awan naziri türkiyege kelgen

Uyghur aptonom rayonliq jama'et xewpsizlik nazaritining mu'awin nazirini öz ichige alghan xitay jama'et xewpsizlik ministirliqining bir wekiller ‍ömiki 3-noyabir küni türkiyege kélip, türkiye ichkiy ishlar ministiri sulayman soylu bilen körüshken. Xitay jama'et xewpsizlik ministirliqining mu'awin ministiri du xongwéy bashchiliqidiki bu ömekke Uyghur aptonom rayonluq jama'et xewpsizlik nazaritining da'imiy ishlargha mes'ul mu'awin naziri pang shining daxil bolushi, bu ziyaretning meqsiti we küntertipige bolghan diqqetni téximu kücheytmekte.

Türkiye ichkiy ishlar ministirliqining bu heqtiki uchurida, sulayman soyluning peqetla du xongwéyni qobul qilghanliqila bildürülgen. Emma bu ziyaretning küntertipige a'‍it héchqandaq uchur bermigen. Türkiyediki taratqularning bu heqtiki xewerliride peqet anadolu agéntliqining bergen xewirinila ishletken. Halbuki, anadolu agéntliqining xewiride bu ziyaretning meqsiti we künteripi heqqidimu héchqandaq uchur bérilmigen. Anadolu agéntliqining körsitishiche, du xongwéy bashchiliqidiki xitay ziyaret ömikining terkibide pang shidin sirt xitay jama'et xewpsizlik ministirliqi térorliqqa qarshi turush idarisining mu'awin bashliqi gaw féymu bar iken. Xitay wekiller ömikining sulayman soylu bilen bolghan bu körüshüshige xitayning enqerediki bash elchisi lyu shawbinmu qatnashqan.

Bu körüshüshke türkiye tereptin türkiye köchmenler idarisining mes'ulliriningmu ishtirak qilishi, dunyadiki Uyghur musapirliri eng köp olturaqlashqan bu dölette téximu diqqet qozghighighan. Anadolu agéntliqining bildürüshiche, bu körüshüshke türkiye ichkiy ishlar ministérliqining mu'awin ministiri ismayil chatakli, türkiye bash saqchi idarisining mu'awin bashliqi exmet shen'güldin bashqa, türkiye köchmenler idarisining tertipsiz köchüshke qarshi turush we chégradin chiqirish ishliri bash mudiri ramazan sechilmish, yawropa ittipaqi we tashqiy munasiwetler bashqarmisining bashliqi sezer ishiktash qatarliq emeldarlarmu qatnashqan.