Хитай һөкүмити уйғур елида "җинайитини тонуп җазани қобул қилиш ишханиси" тәсис қилған

Мухбиримиз ирадә
2021-09-16
Share

Хитай һөкүмитиниң уйғур елидики йоқири бесимлиқ сияситини давамлиқ күчәйтиватқанлиқи мәлум болмақта. Игилинишичә, хитай даирилири уйғур елиниң майтағ районида "тунҗи җинайитини тонуп җазани қобул қилиш, шикайәт қилиш вә ақлашни кеңишиш ишханиси" тәсис қилғанлиқини җакарлиған.

Хитайдики "хәлқ тори" 16-сентәбир тарқатқан бу һәқтики хәвәрдә мәзкур ишхана һәққидә мундақ дийилгән: "җинайитини тонуп, җазани қобул қилғанларға кәңчилик қилиш түзүминиң омумиййүзлүк илгири сүрүлүши вә әмәлийләштүрүлүшигә әгишип, шикайәт қилиш, ақлаш вә кеңишиш һалқилирини қелиплаштуруш, ашкарилаш қурулушида җиддий бөсүш һасил қилишқа тегишлик муһим вәзипигә айланди."

Хәвәрдә ейтилишичә, бу вәзипигә асасән йеқинда қарамай шәһири майтағ районлуқ хәлқ тәптиш мәһкимиси уйғур ели бойичә "тунҗи җинайитини тонуш, җазани қобул қилиш кеңишиш ишханиси" тәсис қилған. Майтағ районлуқ тәптиш мәһкимисиниң алақидар мәсули сөзидә бу арқилиқ җинайәт гумандари вә җавабкарниң җинайитини тонуш позитсийәсиниң тәкрарлинишидин үнүмлүк сақланғили, җинайитини тонуш вә җазани етирап қилишниң муқимлиқиға һәқиқий капаләтлик қилғили болидиғанлиқини илгири сүргән.

Хитай даирилири 2017-йили кәң көләмдә лагер түзүмини йолға қоюштин илгири җай-җайларда мушундақ "җинайитини етирап қилип кәңчиликкә еришиш" һәрикити қозғиған вә һәр йәрдә паш қилиш сандуқлири, паш қилиш телефони дегәнләрни тәсис қилип, аһалиләрни өзини вә башқиларни паш қилишқа қистиған. Радийомиз дәлиллигән бу һәқтики хәвәрләрдә, нурғун кишиләрниң лагерға қамилишида мана мушундақ аталмиш "җинайитини тонуш" җәряниниң дәстәк қилинғанлиқи ашкариланған иди.

Һалбуки, хитай һөкүмитиниң әмдиликтә бу һәрикитини рәсмийләштүрүп рәсмий һөкүмәт ргини қуруши, чәт әлләрдики уйғур көзәткүчиләрниң күчлүк диққитини қозғиди. Улар буни хитай һөкүмитиниң райондики бесим вә қамалини һәссиләп күчәйтидиғанлиқиниң бишарити, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт