Xitay hökümiti Uyghur élida "Jinayitini tonup jazani qobul qilish ishxanisi" tesis qilghan

Muxbirimiz irade
2021-09-16
Share

Xitay hökümitining Uyghur élidiki yoqiri bésimliq siyasitini dawamliq kücheytiwatqanliqi melum bolmaqta. Igilinishiche, xitay da'iriliri Uyghur élining maytagh rayonida "Tunji jinayitini tonup jazani qobul qilish, shikayet qilish we aqlashni kéngishish ishxanisi" tesis qilghanliqini jakarlighan.

Xitaydiki "Xelq tori" 16-séntebir tarqatqan bu heqtiki xewerde mezkur ishxana heqqide mundaq diyilgen: "Jinayitini tonup, jazani qobul qilghanlargha kengchilik qilish tüzümining omumiyyüzlük ilgiri sürülüshi we emeliyleshtürülüshige egiship, shikayet qilish, aqlash we kéngishish halqilirini qéliplashturush, ashkarilash qurulushida jiddiy bösüsh hasil qilishqa tégishlik muhim wezipige aylandi."

Xewerde éytilishiche, bu wezipige asasen yéqinda qaramay shehiri maytagh rayonluq xelq teptish mehkimisi Uyghur éli boyiche "Tunji jinayitini tonush, jazani qobul qilish kéngishish ishxanisi" tesis qilghan. Maytagh rayonluq teptish mehkimisining alaqidar mes'uli sözide bu arqiliq jinayet gumandari we jawabkarning jinayitini tonush pozitsiyesining tekrarlinishidin ünümlük saqlan'ghili, jinayitini tonush we jazani étirap qilishning muqimliqigha heqiqiy kapaletlik qilghili bolidighanliqini ilgiri sürgen.

Xitay da'iriliri 2017-yili keng kölemde lagér tüzümini yolgha qoyushtin ilgiri jay-jaylarda mushundaq "Jinayitini étirap qilip kengchilikke érishish" herikiti qozghighan we her yerde pash qilish sanduqliri, pash qilish téléfoni dégenlerni tesis qilip, ahalilerni özini we bashqilarni pash qilishqa qistighan. Radiyomiz delilligen bu heqtiki xewerlerde, nurghun kishilerning lagérgha qamilishida mana mushundaq atalmish "Jinayitini tonush" jeryanining destek qilin'ghanliqi ashkarilan'ghan idi.

Halbuki, xitay hökümitining emdilikte bu herikitini resmiyleshtürüp resmiy hökümet rgini qurushi, chet ellerdiki Uyghur közetküchilerning küchlük diqqitini qozghidi. Ular buni xitay hökümitining rayondiki bésim we qamalini hessilep kücheytidighanliqining bishariti, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet