Amérikaning yéngi prézidénti jow baydinmu xitayning Uyghurlargha irqiy qirghinchiliq yürgüzüwatqanliqini bildürgen

Muxbirimiz erkin
2021-01-25
Share

Amérikining yéngi prézidénti jow baydinmu xitay Uyghurlargha qarita irqiy qirghinchiliq yürgüzüwatidu, dep qaraydighanliqini bildürgen. "Washin'gton közetküchisi" gézitining 24-yanwar xewer qilishiche, aqsaray dölet xewpsizlik kéngishining bayanatchisi émili xorné, mezkur gézitning muxbirigha: "Prézidént baydén Uyghurlargha qaritilghan basturushni irqiy qirghinchiliq, dep atidi we uninggha mumkin bolghan eng küchlük ibariler bilen qarshi turidu" dégen.

Sabiq prézidént tramp hökümiti 20-yanwar wezipisini axirlashturushtin bir kün burun "Xitayning Uyghurlargha qarita irqiy qirghinchiliq we insaniyetke qarshi jinayet sadir qilghanliqi" ni élan qilghan. Biraq tramp hökümitining bu qararigha yéngi prézidént baydénning qandaq inkas bildürüshi xelq'araning diqqet nuqtisigha aylan'ghanidi. Prézidént baydénning axbarat bayanatchisi jin saki ötken jüme küni muxbirlarning bu heqtiki so'aligha, prézidéntning buninggha qarap chiqidighanliqi, uning ilgiri Uyghurlar uchrawatqan qorqunchluq mu'amile toghrisida sözligenliki, bu toghrisida özining deydighan bashqa sözi yoqluqini bildürgenidi.

"Washin'gton közetküchisi" ning bildürüshiche, émili xorné baydénning bu mesilidiki pozitsiyeside héchqandaq özgirish yoqluqi, u xitayning qilmishini izchil irqiy qirghinchiliq, dep ataydighanliqini bildürgen. Buning aldida baydén hökümitining tashqi ishlar ministiri antoni blinkénmu amérika kéngesh palatasining guwahliq yighinida sabiq tashqi ishlar ministiri pompéyoning bu heqtiki qararini qollaydighanliqi, xitayni "Uyghurlargha irqiy qirghinchiliqi yürgüzüwatidu", dep qaraydighanliqini bildürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet