Prézidént baydén, xitay bilen “Pewqul'adde keskin riqabet” ichide ikenlikini bildürdi

Amérika prézidénti jow baydén, uning rehberlikidiki amérika hökümitining xitay bilen “Pewqul'adde keskin riqabet” ichide ikenliki, biraq amérikna'ing xitay bilen bolghan munasiwette toqunushqa éhtiyajliq emeslikini bildürgen. Prézidént baydénning 7-yanwar (yekshenbe küni) amérika CBStéléwiziye qanilining ziyaritini qobul qilghanda éytishiche, u wezipige olturghan 20-yanwardin béri shi jinping bilen körüshüp baqmighan. Lékin u özining ilgiri mu'awin prézidéntliq dewride uning bilen köp qétim uchrashqanliqi, uning bilen uchrishishining dunyadiki bashqa herqandaq bir rehberdin köp ikenlikini bildürgen.

Prézidént baydén shi jinpingni “Nahayiti yaxshi bilidighanliqi”, uning “Nahayiti eqilliq”, “Nahayiti qattiq” adem ikenlikini bildürüp, “Biraq uning söngikide démokratiye zerrichilikmu yoq” dégen. Bu baydénning wezipige olturghandin béri tunji qétim amérika taratqulirida özining xitay toghrisidiki oy-pikirini bayan qilishi we shi jinpinggha baha bérishidur. Birleshme agéntliqining xewiride qeyt qilinishiche, xitay baydén hökümitidin ikki terep munasiwitining yumshishini kütsimu, biraq yéngi hökümetning amérikaning soda, teywen, kishilik hoquq, jenubiy déngiz mesililiridiki pozitsiyesini özgertishi natayin iken.

Prézidént baydén ziyarette özining shi jinpinggha “Izchil toqunushup qalmasliqimiz kérek” dep éytip kelgenlikini körsitip, emma xitay bilen “Pewqul'adde keskin riqabet bolidu we buni men u bilidighan usul bilen qilmaymen”, dégen. Uning tekitlishiche, u amérika-xitay munasiwetliride sabiq prézidént trampning tutqan yolini tutmaydighanliqi, buningda “Xelq'ara qa'idilerning yoligha merkezlishidighanliqi” ni bildürgen.

Baydén bu sözlerni amérika tashqi ishlar ministirliqi amérikaning b d t kishilik hoquq kéngishige qaytip kélidighanliqini élan qilishning aldida qildi. Melum bolushiche, amérika tashqi ishlar ministiri blinkén, amérikaning düshenbe küni kishilik hoquq kéngishi bilen körüshidighanliqini bildürgen.