Президент байден, хитай билән “пәвқуладдә кәскин риқабәт” ичидә икәнликини билдүрди

• Мухбиримиз әркин
  2021-02-08

Америка президенти җов байден, униң рәһбәрликидики америка һөкүмитиниң хитай билән “пәвқуладдә кәскин риқабәт” ичидә икәнлики, бирақ америкнаиң хитай билән болған мунасивәттә тоқунушқа еһтияҗлиқ әмәсликини билдүргән. Президент байденниң 7-январ (йәкшәнбә күни) америка CBSтелевизийә қанилиниң зияритини қобул қилғанда ейтишичә, у вәзипигә олтурған 20-январдин бери ши җинпиң билән көрүшүп бақмиған. Лекин у өзиниң илгири муавин президентлиқ дәвридә униң билән көп қетим учрашқанлиқи, униң билән учришишиниң дунядики башқа һәрқандақ бир рәһбәрдин көп икәнликини билдүргән.

Президент байден ши җинпиңни “наһайити яхши билидиғанлиқи”, униң “наһайити әқиллиқ”, “наһайити қаттиқ” адәм икәнликини билдүрүп, “бирақ униң сөңикидә демократийә зәрричиликму йоқ” дегән. Бу байденниң вәзипигә олтурғандин бери тунҗи қетим америка таратқулирида өзиниң хитай тоғрисидики ой-пикирини баян қилиши вә ши җинпиңға баһа беришидур. Бирләшмә агентлиқиниң хәвиридә қәйт қилинишичә, хитай байден һөкүмитидин икки тәрәп мунасивитиниң юмшишини күтсиму, бирақ йеңи һөкүмәтниң американиң сода, тәйвән, кишилик һоқуқ, җәнубий деңиз мәсилилиридики позитсийәсини өзгәртиши натайин икән.

Президент байден зиярәттә өзиниң ши җинпиңға “изчил тоқунушуп қалмаслиқимиз керәк” дәп ейтип кәлгәнликини көрситип, әмма хитай билән “пәвқуладдә кәскин риқабәт болиду вә буни мән у билидиған усул билән қилмаймән”, дегән. Униң тәкитлишичә, у америка-хитай мунасивәтлиридә сабиқ президент трампниң тутқан йолини тутмайдиғанлиқи, буниңда “хәлқара қаидиләрниң йолиға мәркәзлишидиғанлиқи” ни билдүргән.

Байден бу сөзләрни америка ташқи ишлар министирлиқи американиң б д т кишилик һоқуқ кеңишигә қайтип келидиғанлиқини елан қилишниң алдида қилди. Мәлум болушичә, америка ташқи ишлар министири блинкен, американиң дүшәнбә күни кишилик һоқуқ кеңиши билән көрүшидиғанлиқини билдүргән.