Jow baydén xitay bilen bolidighan sodida mal teminlesh liniyesini “Zerbidar küch” qilmaqchi bolghan

Roytrés agéntliqining xewer qilishiche, baydin hökümiti 8-iyun küni mal teminlesh liniyesini yéngi “Zerbidar küch” qilip, xitayning tengsiz sodisigha zerbe bermekchi bolghanliqini bildürgen. Bu hökümet yérim ötküzgüchtin tartip éliktérliq mashina batariyesigiche bolghan muhim mehsulatlargha bahalash élip barghan.

Amérika soda wekilliri bashchiliqidiki mal teminlesh linyesi zerbidar küchi xitayning mehsulatliridiki zorawanliqqa chétishliq mesililerni izdewatqan bolup, chégra béjini östürüsh yaki tölem élish arqiliq uni hel qilishni oylishishqa bolidiken.

Prézidént jow baydén bu yil 2-ayda muhim mehsulatlarning mal teminlesh liniyesini tekshürüshni buyrughan bolup, ijra'iye organlirining amérika üchün xeterlik bolghan muhim mehsulatlarni 100 kün ichide tekshürüp bahalap, doklat qilishini telep qilghan. Bu qétimqi tekshürüsh we bahalash baydén hökümitining omumiy istratégiyesining bir qismi bolup, gerche mexsus xitaygha qaritilmighan bolsimu, emma xitaygha qarshi riqabet küchini ashurushta muhim rol oynaydiken.

Baydén hökümitining iqtisad meslihetchisi jérd bérnistén mundaq dégen: “Biz mal teminlesh liniyesining arqisidiki mal yötkesh herikitini igileshke tirishiwatimiz. Buni béjirishning eng yaxshi usuli shu kesipning ichidiki ademler bilen alaqe qilish, biz hazir mushu ishlarni qiliwatimiz”.

Baydén hökümiti buyruq chüshürüp bir yil bolghanda, amérika hökümet organliri téximu mukemmel bolghan tekshürüsh doklati élan qilip, dölet ichidiki yasash sana'itide saqlan'ghan kemchiliklerni tépip chiqidiken we buni hel qilish siyasetlirini tüzidiken.