Xitaydiki eng chong musulmanlar tor béti taqap qoyuldi

Xitaydiki eng chong musulmanlar to békiti-“Jonggu musulmanlar tori” taqap qoyulghan. Lékin, uning waqitliq yaki pütünley taqalghanliqi we taqilish sewebi melum emes. Bu torning ismi sezgür sözlük qatarigha kirgüzülüp, torda izdesh cheklen'gen. Bezi axbarat wasitiliri, bu torning “Diniy radikalliqni terghip qilish”qa chétishliq, dep taqalghanliqini ilgiri sürgen. Radi'omizning muxbiri bu torning gensu lenjudiki merkizige téléfon qilghan bolsimu, lékin ziyaret qobul qilishni ret qilghan.

“Jonggu musulmanlar tori” 2003-yili qurulghan bolup, u tungganlar arisida tesiri chong torlarning biri idi. Mezkur torda xitayning musulmanlar siyasiti, uning Uyghur rayonida yolgha qoyghan hijap, chümbel we bashqa diniy simwollarni cheklesh siyasi, halal yémeklerni qoghdash, até'izmning insan exlaqigha ziyanliq ikenliki qatarliq témilarda nurghun maqale, pikirler élan qilin'ghan.

Xitay kishilik hoquq pa'aliyetchisi xu jünning radi'omizgha bildürüshiche, bundaq mötidil bir tor betning “Diniy radikalliq idiyisini terghip qilish” bilen eyiblinishini tesewwur qilish besi müshkül iken.

Bezi xewerlerde. Mezkur torning taqilishini xitay memliketlik diniy-milliy ishlar komitétining tunggan mudiri wang jéngwéyning wezipisidin élip tashlinishigha baghlighan. Wang jingwéy, milliy xasliqni tekitlep, tunggan rayonlirida nurghun meschitlerni saldurghan, halal yémeklik qanuni chiqirishni qollap, kompartiye ichidiki chong xenzuchi küchlerning hujum nishanigha aylinip qalghan idi.