Зумрәт обул асасий маарип системисида “җуңхуа миллити ортақ гәвдиси еңи” ни омумлаштурушни тәкитлигән

Вашингтондин мухбиримиз ирадә тәйярлиди
2023.09.21

Уйғур аптоном районлуқ хәлқ қурултийи даимий комитетиниң мудири зумрәт обул уйғур елидә мәҗбурий маарип қануниниң әмәлийлишиш әһвалини тәкшүргәндә қилған сөзидә, мәктәпләрдә “җуңхуа миллити ортақ гәвдиси еңи” ни кәң қанат яйдурушни тәкитлигән.

“тәңритағ тори” ниң 21-сентәбир күнидики хәвиридә дейилишичә, зумрәт обул шу күндики сөзидә “маарипқа сиясий нуқтидин қараш, ши җинпиңниң маарип хизмити тоғрисидики йолйоруқини мәҗбурий маарипиниң нишани билән бирләштүрүш” ни тәләп қилған. У, асасий маарип системисида, болупму башланғуч-оттура мәктәпләрниң оқутуш мәзмунида “шинҗаңни мәдәнийәт арқилиқ озуқландуруш”, “җуңхуа миллити ортақ гәвдиси еңи” ни тәшвиқ қилишни қаттиқ күчәйтишни тәләп қилған.

Уйғур аптоном районлуқ хәлқ қурултийи даимий комитетиниң мудири зумрәт обул йеқинда хотәнниң нийә вә чира наһийәлиридә тәкшүрүштә болғандиму “җуңхуа миллити ортақ гәвдиси” еңини тәшвиқ қилишни күчәйтишни тәкитлигән иди.

Зумрәт обул қәшқәрдә туғулған болуп, ма шиңруй уйғур аптоном райониға партком секретари болуп кәлгәндин кейин, ирқий қирғинчилиқ давамлишиватқан пәвқуладдә бир мәзгилдә у қумул вилайитиниң валийлиқидин өстүрүлүп, уйғур аптоном районлуқ партком даимий комитетиниң әзаси, бирликсәп бөлүминиң башлиқи қатарлиқ вәзипиләргә қоюлған, 2023-йили 1-айда уйғур аптоном районлуқ хәлқ қурултийи даимий комитетиниң мудирлиқиға тәйинләнгән.

Аталмиш “җуңхуа миллити ортақ гәвдиси еңи” дегән бу сиясий аталғу хитайдики хитай болмиған милләтләрни хитайлаштурушни мәқсәт қилған әшәддий хитай милләтчиклики тәшвиқатиниң бир парчиси болуп, йеқинқи йиллардин буян уйғур елидә кәң көләмдә тәшвиқ қилинип кәлмәктә.

Йеқинда уйғур аптоном районлуқ сиясий кеңәш даимий комитетиниң 13-нөвәтлик алаһидә йиғинида аталмиш “җуңхуа милләтлири ортақ гәвдиси еңи” бәрпа қилиш тоғрилиқ қарар мақуллинип, ши җинпиңниң “йеңи дәврдики шинҗаңни идарә қилиш истратегийәси” ни қәтий изчиллаштуруш; тарих, археологийә, мәдәнийәт вә башқа түрлүк саһәләрдә “җуңхуа миллити ортақ еңи” бәрпа қилиш; шундақла “шинҗаң әзәлдин хитайниң айрилмас бир қисми” дәйдиған сәпсәтәни пуқралар меңисигә қуюш тәләп қилинған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.