Уйғур дияридики "җуңхуа кимлики" қурулуши асасий еқимға айлиниш алдида турмақта

Мухбиримиз әзиз
2021-10-19
Share

Хитай һөкүмити башқурушидики "тәңритағ тори" ниң 19-өктәбирдики хәвиридә ейтилишичә, уйғур дияридики биринчи номурлуқ әмәлдар чен чүәнго шу күни чақирилған "ш у а р парткомниң шинҗаңни омумйүзлүк қанун бойичә идарә қилиш комитети" ниң хизмәт йиғиниға риясәтчилик қилған. Йиғинда у бундин кейинки омумий хизмәт орунлаштурмисида мәркәзниң қанун арқилиқ идарә қилиш һәққидики йолйоруқлириға бинаән сиясий аңни өстүрүш, партийәниң "шинҗаңни идарә қилиш истратегийәси" ни толуқ иҗра қилиш арқилиқ "техиму юқири сәвийәдики тинчлиқ һөкүм сүргән, қанун арқилиқ идарә қилиш омумлашқан", муқимлиқ вә әминликкә толған муһит бәрпа қилишниң мәркәз қилинидиғанлиқини тәкитлигән.

Хәвәрдә ейтилишичә, бундин кейинки һәр дәриҗилик һөкүмәт тармақлириниң муһим вәзипииси сиясий аңни контрол қилиш вә қанун сепини кеңәйтиш болуп, хәлқ турмушини яхшилаш һәққидә һечқандақ сөз қилинмиған. Техиму муһими бундин кейинки партийә хизмитиниң бир муһим вәзиписи кишиләрниң дөләт қариши, җуңхуа ортақ гәвдиси қариши қатарлиқ чүшәнчиләрни толуқ өзләштүрүшкә һәйдәкчилик қилиш болидиғанлиқи, биринчи түркүм сиясий-қанун сепини мустәһкәмләш арқилиқ иккинчи түркүм сиясий-қанун сепигә яхши асас яритиш керәклики мәхсус шәрһиләнгән.

Вашингтон шәһиридики "коммунизм қурбанлири хатирә фонди" ниң тәтқиқатчиси доктур адрян зенз бу һәқтики зияритимиз җәрянида хитай һөкүмитиниң уйғур дияридики хитайлаштуруш лайиһәси һәққидә тохтилип "хитай һөкүмити 2040-йилиға барғанда тарим вадисидики һәрқайси вилайәт вә шәһәрләрдә хитайларниң нопусини уйғурлар билән тәңләштүрмәкчи болуватиду. Бу җәрянда сиясий бастурушниң сәвийәси барғансери юқирилап меңиши мумкин" дегән иди. Чен чүәнгониң бу қетимқи йиғинда тәкитлигәнлири бу пикирниң урунисиз әмәсликини йәнә бир қетим көрсәтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт