Kaliforniyede bir xitay inzhénér bashqurulidighan bombigha da'ir mexpiy layiheni oghrilighanliqtin qolgha élin'ghan

Washin'gtondin muxbirimiz irade teyyarlidi
2024.02.08

Amérika puqrasi bolghan bir neper xitay inzhénér amérikaning muhim téxnikisini oghrilash jinayiti bilen eyiblinip qolgha élin'ghan.

NBC Xewerler torining bildürüshiche, amérika edliye ministirliqi kaliforniye ishtatining san-xosey rayonida olturushluq 57 yashliq gong chénggu'angning soda mexpiyetlikini oghrilash jinayiti bilen eyiblen'genlikini bildürgen.

Sot höjjitide ashkarilinishiche, gong chinggu'ang amérika hökümiti üchün yasap chiqilghan yadroluq bashqurulidighan bomba qoyup bérishni bayqash, ballistik we awazdin téz uchidighan bashqurulidighan bombini iz qoghlash, sénzor layihelesh qatarliq alem boshluqi sistémisida ishlitilidighan infira qizil nurluq sénzorning layihelirini oghrilighan.

Amérika hökümiti we gong chinggu'ang ishligen amérika shirkiti edliye ministirliqining sot höjjitide “Ziyankeshlikke uchrighuchi terepler” dégen tizimlikke kirgüzülgen. Amérika hökümiti we bu shirket gong oghrilighan téxnikilarni tereqqiy qildurush üchün yette yildin köprek waqit serp qilghan hemde yiligha nechche on milyon dollar meblegh salghan iken.

Edliye tarmaqliri eger bu téxnikilar riqabetchi shirketler we düshmen döletlerning qoligha ötüp ketken bolsa, buning mezkur amérika shirkiti üchün ghayet zor iqtisadiy ziyan bolupla qalmay, belki amérikaning dölet bixeterlikigimu zor tehdit peyda qilidighanliqini éytqan.

Amérikaliq adwokat martin éstrada (Martin Estrada) , gong chinggu'angning burunmu xitayning herbiy iqtidarini kücheytish üchün téxnika jasusluqi qilghanliqini bildürgen. U mundaq dégen: “Biz xitayni öz ichige alghan chet el aktiyorlirining aktipliq bilen téxnikimizni oghrilimaqchi boluwatqanliqini bilimiz, biz amérika karxaniliri we tetqiqatchilirining yéngiliqlirini qoghdash arqiliq bu tehditke qarshi hoshyarliqni saqlaymiz” .

NBC Téléwiziyesining xewer qilishiche, amérika fédératsiye tekshürüsh idarisi gong chinggu'angning 2014-yildin 2022-yilliri arisida amérikadiki muhim pen-téxnika shirketliride xizmet qiliwatqan mezgilliride xitay orunlashturghan “Ixtisasliqlar pirogrammisi” gha bir qanche qétim iltimas sun'ghanliqini bayqighan. Bu pirogramma xitayning chet ellerde yashaydighan, emma xitayning iqtisadiy we herbiy ishlirigha yardem béreleydighan maharet, iqtidar we bilimge ige kishilerni bayqashni meqset qilghan pirogramma bolup, gong chinggu'ang yene bu yillar ichide bir qanche qétim xitaygha barghan.

Gong chinggu'ang esli xitayda tughulghan bolup, u 2011-yili amérika puqrasi bolghan iken. U, 20-féwral los-anzhélsta sotqa chiqidiken. Eger uning jinayiti békitilgen teqdirde, on yilghiche bolghan muddetlik qamaq jazasigha höküm qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.