Канада һөкүмити: "һүсәйин җелил делоси биз үчүн йәнила муһим мәсилә"

Мухбиримиз әркин
2016-03-18
Share

Канада һөкүмити хитай түрмисидики уйғур канада пуқраси һүсәйин җелилниң мәсилисини канада үчүн йәнила муһим мәсилә, дәп қарайдиғанлиқини билдүргән. Канаданиң ташқи ишлар министирлиқи канада ахбаратида бәргән баянатида, "җелилниң делоси канада һөкүмити үчүн муһим мәсилә. Канада бу мәсилини юқири дәриҗиликләр учришишлирида давамлиқ оттуриға қойиду," дегән.

Бу, канада тровду һөкүмитиниң 11-айда һоқуқни өткүзүвалғандин буян тунҗи қетим һүсәйин җелил мәсилисигә ипадә билдүрүшидур.

Канада "йәр шари хәвәрлири гезити" ниң хәвиридә нәқил кәлтүрүшичә, канада һөкүмити баянатида йәнә "биз давамлиқ хитай һөкүмитини канада әмәлдарлириниң һүсәйин җелилни зиярәт қилип, униң әһвалини тәкшүрүшкә йол қоюшқа чақиримиз. Бизниң нишанимиз хәлқара өлчәмләр бойичә һүсәйин җелилниң саламәт туруши вә адил муамилигә учришиға капаләтлик қилиш" дәп тәкитлигән.

Бирақ хитай һөкүмити, һүсәйин җелилниң канада пуқралиқини давамлиқ рәт қилип кәлди. Хитайниң канадада турушлуқ әлчиханиси "йәр шари хәвәрлири гезити" гә бәргән баянатида, "һүсәйин җелил хитай пуқраси, у қамақ җазасини өтәватиду. Биз бу мәсилини давамлиқ қанун бойичә бир тәрәп қилимиз" дегән.

Һүсәйин җелил 2006‏-йили өзбекистанда қолға елинип, хитайға өткүзүп берилгән. Хитай һөкүмити уни "террорлуқ" билән әйибләп муддәтсиз қамақ җазасиға һөкүм қилған. Йеқинда униң қамақ җазаси қисқартилған иди. "йәр шари хәвәрлири гезити" шу мунасивәт билән униң һәққидә бир мақалә вә телевизийә программиси тәйярлиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт