Kanada hökümiti: "Hüseyin jélil délosi biz üchün yenila muhim mesile"

Muxbirimiz erkin
2016-03-18
Share

Kanada hökümiti xitay türmisidiki Uyghur kanada puqrasi hüseyin jélilning mesilisini kanada üchün yenila muhim mesile, dep qaraydighanliqini bildürgen. Kanadaning tashqi ishlar ministirliqi kanada axbaratida bergen bayanatida, "Jélilning délosi kanada hökümiti üchün muhim mesile. Kanada bu mesilini yuqiri derijilikler uchrishishlirida dawamliq otturigha qoyidu," dégen.

Bu, kanada trowdu hökümitining 11-ayda hoquqni ötküzüwalghandin buyan tunji qétim hüseyin jélil mesilisige ipade bildürüshidur.

Kanada "Yer shari xewerliri géziti" ning xewiride neqil keltürüshiche, kanada hökümiti bayanatida yene "Biz dawamliq xitay hökümitini kanada emeldarlirining hüseyin jélilni ziyaret qilip, uning ehwalini tekshürüshke yol qoyushqa chaqirimiz. Bizning nishanimiz xelq'ara ölchemler boyiche hüseyin jélilning salamet turushi we adil mu'amilige uchrishigha kapaletlik qilish" dep tekitligen.

Biraq xitay hökümiti, hüseyin jélilning kanada puqraliqini dawamliq ret qilip keldi. Xitayning kanadada turushluq elchixanisi "Yer shari xewerliri géziti" ge bergen bayanatida, "Hüseyin jélil xitay puqrasi, u qamaq jazasini ötewatidu. Biz bu mesilini dawamliq qanun boyiche bir terep qilimiz" dégen.

Hüseyin jélil 2006‏-yili özbékistanda qolgha élinip, xitaygha ötküzüp bérilgen. Xitay hökümiti uni "Térrorluq" bilen eyiblep muddetsiz qamaq jazasigha höküm qilghan. Yéqinda uning qamaq jazasi qisqartilghan idi. "Yer shari xewerliri géziti" shu munasiwet bilen uning heqqide bir maqale we téléwiziye programmisi teyyarlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet