Kanada “Uyghur heqlirini qoghdash qurulushi” qatarliq teshkilatlarning cheklinishi küchlük eyibleshke uchridi

Washin'gtondin muxbirimiz jewlan teyyarlidi
2024.12.25

Xitay hökümiti kanada “Uyghur heqlirini qoghdash qurulushi”, “Kanada tibet komitéti” qatarliq ikki teshkilat we bu orunlarda ishlewatqan 20 xizmetchi, mutexessislerge jaza cheklimisi qoyghandin kéyin, hökümet we teshkilatlardin uninggha qarshi küchlük inkas we tenqidler kelmekte.

Dunya Uyghur qurultiyi kanada “Uyghur heqlirini qoghdash qurulushi” we u orunda ishlewatqan 14 shexsning muhajirettiki Uyghurlarni kanadagha makanlashturush üchün tirishchanliq körsitiwatqanliqini, xitayning shu sewebtin bu teshkilatqa jaza cheklimisi qoyghanliqini bildürdi. Dunya Uyghur qurultiyi re'isi turghunjan alawudun söz qilip: “Bu del kommunist xitayning birge bir jaza qoyushtek tipik qilmishi, halbuki xitayning bu qilghini peqet öch élish xaraktérini alghan. Bu jaza emeliyette ‛Uyghur heqlirini qoghdash qurulushi‚ qiliwatqan xizmetlerning aktip tesir peyda qiliwatqanliqini körsitidu” dédi.

Xitay tashqi ishlar ministirliqining torida élan qilin'ghan uchurlardin melum bolghinidek, xitay da'iriliri bu qétim “Uyghur heqlirini qoghdash qurulushi” bilen “Kanada tibet komitéti” ni nuqtiliq öch élish nishani qilghan bolup, “Uyghur heqlirini qoghdash qurulushi” ning ijra'iye diréktori memet toxti, bu teshkilatning siyaset we pa'aliyet ishlirigha mes'ul on nechche shexske émbargo qoyulghanidi.

2024-Yil 22-dékabir küni xitayning hökümet awazi bolghan “Yer shari waqit géziti” bu jaza cheklimisini élan qilghanidi. Uningdin ilgiri kanada tashqi ishlar ministirliqi xitayning Uyghur rayonida yürgüzüp kelgen irqiy qirghinchiliq jinayitini ijra qilishqa qatnashqan chén chüen'go, erkin tuniyaz, shöhret zakir, péng jyaru, wu yingjé qatarliq 8 emeldargha jaza cheklimisi qoyghanidi.

“Roytérs agéntliqi” ning xewer qilishiche, kanada hökümiti 24-dékabir küni bayanat bérip, xitayning “Uyghur heqlirini qoghdash qurulushi”, “Kanada tibet komitéti” we bu ikki teshkilatta ishlewatqan 20 kishige jaza cheklimisi qoyghanliqini eyibligen.

12-Ayning 25-küni sürgündiki tibet hökümiti parlaménti axbarat élan qilip, xitay hökümitining “Kanada tibet komitéti” we “Uyghur heqlirini qoghdash qurulushi”, shundaqla 20 kishilik hoquq pa'aliyetchisige jaza cheklimisi qoyghanliqini qattiq eyiblesh bilen birge, mezkur ikki teshkilat we ularning xadimlirining xitayning qebih zorawanliqi we kishilik hoquq jinayetlirige baturluq bilen qarshi turup kéliwatqanliqini medhiyeligen hemde tibet sürgünde hökümitining ular bilen bir septe turidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.